Kodheli: Hera e parë që forcat detare shqiptare janë pjesë e një misioni detar
Shqipëria po shqyrton mundësitë që të bëhet pjesë e operacioneve të koalicionit anti ISIS në terren. Kështu ka deklaruar Ministrja e Mbrojtjes, Mimi Kodheli në fjalën e saj në Asamblenë Parlamentare të NATO-s, e cila po zhvillon ditën e dytë të punimeve të saj në Tiranë. “Ne jemi në proces shqyrtimi dhe krijimi të hapësirave ligjore, për të mbështetur përpjekjet e koalicionit anti-ISIS në terren, si dhe jemi duke vlerësuar nga afër përfshirjen në operacionin detar të NATO-s në Detin Egje, për të ndihmuar në krizën e refugjatëve. Në kuadër të BE-së, prej nëntorit 2015, kemi dërguar një ekip çminimi (EOD) në Mali dhe jemi duke kontribuar me oficer shtabi në operacionin ALTHEA, në Bosnje-Hercegovinë”. Kjo është hera e parë që forcat detare të Shqipërisë do të marrin pjesë në një operacion detar në detin Egje dhe Mesdhe, në ndihmë të forcave të NATOS për misionin e menaxhimit të krizës së refugjatëve. “Ne jemi sot në përfundim të diskutimit për të nisur një anije në mbështetje të projektit NATO që mbështet projektin europian të menaxhimit të krizave në detin Egje e Mesdhe me një anije tonën e cila do të ketë një rrotacion të caktuar”. Ministrja Kodheli ka bërë të ditur gjithashtu se në Tiranë do të ngrihet një qendër ekselence e NATO-s, kundër fenomenit të luftëtarëve të huaj, të cilët “ushqejnë” organizatat terroriste në Lindjen e Mesme dhe Afrikën e Veriut.
