Pasi tregoi me pamje procesin e kultivimit të kanabisit në veri të vendit, gazetari i Abc News, Artan Hoxha ka publikuar një tjetër video, ku këtë herë tregon procesin e tharjes së bimës narkotike. Gazetari thotë që videoja, në të cilën shihet procesi i tharjes së kanabisit është regjistruar në zonën e Poliçanit.
“E gjithë salla është kthyer në infrastrukturë për tharjen e kanabisit. Kjo është në zonën e Tërpanit, në Poliçan dhe shikoni se çfarë investimi është bërë. Këtu janë deri në tre mijë rrënjë kanabis”,- tha ai në emisionin “Opinion”.
Ai publikoi pamje nga parcelat në Skrapar. Hoxha solli edhe disa foto ku shihen se si në këtë proces përdoren panelet diellore.
Artan Hoxha thotë që këtë vit çmimi i kanabisit ka arritur deri në 1300 euro kilogrami, ndërsa u shpreh se personat që e kultivojnë nuk janë banorë të zonave, por grupe nga Tirana, Fushë-Kruja, Kukësi, Mamurrasi apo zona të tjera.
