Lidhur me atentatin mafioz të mëngjesit të sotëm ku u ekzekutua Behar Sofia, Artan Hoxha pritet të zbardhë informacione tronditëse sonte në orën 19:00 në edicionin qendror të lajmeve në ABC.
Hoxha shkruan se Behar Sofia ishte një ndër personazhet kyçe të zbardhjes së makakrës së gushtit 2009 ku u vranë 4 oficerë policie. Gazetari investigativ i ABC-së thekson se Behar Sofia ishte i pranishëm me makinën e tij në vendin e ngjarjes, ku u vranë policët.
Gjithashtu Hoxha shkruan se Behar Sofia kishte ardhur në vendin e ngjarjes për të dorëzuar një thes me para.
Postimi i plotë i Hoxhës:
Thjeshtë një episod nga arkiva…
Më në fund Benzi me targa TR 1638 S, doli nga errësira…
Por për fat të keq, humbëm mundësinë e fundit për të zbardhur të vërtetën e ekzekutimit të 4 Dëshmorëve të Atdheut, Fatos Xhani, Kastriot Feska, Saimir Duçkollari e Altin Dizdari, pjestarë të skuadrës operacionale të Policisë së Shtetit.
Dëshmitari kyç i masakrës së 7 gushtit 2009, njeriu që mund të zbardhte me detaje dhe prova, deri ku krerët e kupolës së Policisë së Shtetit ishin implikuar me krimin e organizuar dhe narkotrafikun ndërkombëtar, nuk jeton më…
Atentati i sotëm, me gjakftohtësi kirurgjikale, në zonën më të mbrojtur të kryeqytetit, me shumë sesa ekzekutimi i një personazhi mjaft të rëndësishëm të botës së krimit gjatë 30 viteve të postkomunizmit, është një mesazh i qartë se askush dhe në asnje cep të Tiranës, nga Rolling Hills deri te Kodra e Diellit, nuk është i paprekshëm….
Po huazoj batutën e atyre të “Rrugës së Elbasanit”…
“Kush e ka rradhën”…
Në foto 1)-Benzi që nuk u ndalua kurrë nga policia dhe u zhduk pa gjurmë pas masakrës së 7 gushtit 2009 në Durrës.
Në foto 2)-Skena e plotë e masakrës së 7 gushtit 2009 në një foto të vetme.
Në të djathtë Tuaregu i zi me derën e pasagjerit hapur, objektiv i operacionit top sekret, pas tij dy veturat Ford të skuadrës operacionale.
Në tokë trupat e Dëshmorëve të Atdheut, që nuk kanë marrë kurrë drejtësi për atë që ndodhi. Në të majtë, Benzi me targa TR 1638 S, i viktimës së atentatit të sotëm që po dorëzonte një thes të rëndë me euro…
Për më tepër sot në oren 19:00, drejtpërdrejt në ABC NEWS.
