Eurodeputetja shqiptare, Arba Kokalari ka folur pas zgjedhjeve të së dielës në lidhje me detyrën e saj të re në Parlamentin Europian.
Ajo është shprehur se sfida të mëdha e presin ndaj të cilave ajo është përgatitur për një kohë të gjatë.
“Puna fillon menjëherë. Takimet dhe negociatat fillojnë tani, derisa në fillim të korrikut është seanca e parë në Strasburg. Jam përgatitur një kohë të gjatë për këtë dhe kam dëshirë të madhe dhe përkushtim për të drejtuar kërkesat e mia në Parlamentin Evropian.
Ka shumë sfida në Evropë tani, por mendoj se çështja më e madhe do të jetë negociatat për buxhetin e BE-së. Mendoj se kjo do të jetë një nga ngjarjet dominuese në vitin e ardhshëm”– u shpreh eurodeputetja.
Kokalari shpreh mirënjohjen e saj për të gjithë ata që e votuan që të ishte përfaqësuesja e Suedisë në PE.
“Jam jashtëzakonisht mirënjohëse për të gjithë ata që më kanë votuar mua dhe Moderatorët. Në veçanti falënderoj qindra aktivistë dhe të rinjtë, si dhe miqtë e mi.”– tha eurodeputetja.
