Faza e grupeve e Europa League është hapur sot me ndeshjen në stadiumin “Tofik Behramov” të Bakusë, ku kampionët e Azerbaixhanit, Karabak, kanë pasur përballë çekët e Slovan Liberec. Ajo çka na intereson ishte forma e shkëlqyer e kapitenit të Kombëtares tonë, Ansi Agolli. Mbrojtësi i lindur në Tiranë bëri gjithçka gjatë atij 90 minutëshi, duke mbrojtur dhe duke qenë prezent në fazën sulmuese pothuajse në çdo aksion të të zotëve të shtëpisë. Dha një seri asistesh për sulmuesit, duke qenë thjeshtë fantastik. Në prag të transfertës tonë në Lihtenshtein, Ansi duket mëse i gatshëm për De Biazin dhe është e pabesueshme kur e sheh në fushë, pasi të jep përshtypjen e një futbollisti me mushkri adoleshenti, por është 34 vjeç. Megjithatë, në ndeshjen e djeshme përpjekjet e Agollit nuk vlejtën për t’i dhënë maksimumin e pikëve skuadrës së tij, pasi sulmuesit e Karabak humbën raste pafund dhe takimi u mbyll në barazim 2-2. Në ndeshjen e dytë, kapitenin tonë mund ta ndjekim në transfertën e Firences, kundër Fiorentinës.
