Ambasadorja e ShBA-së, Yuri Kim, ka ashpërsuar tonet ndaj politikanëve shqiptarë, pas thirrjeve të vazhdueshme për të bërë funksionale brenda këtij viti Gjykatën Kushtetuese.
Kim do të japë mbrëmjen e sotme një intervistë për “Zërin e Amerikës”, ku në një pjesë të shkurtër të publikuar në faqen e “Facebook” të ambasadës amerikane, kryediplomatja thekson se “njerëzit nuk duhet të presin deri zgjedhjet e ardhshme për të pasur një Gjykatë Kushtetuese”.
“Unë nuk mendoj se njerëzit duhet të presin deri zgjedhjet e ardhshme për të pasur një Gjykatë Kushtetuese. Ata nuk duhet të presin derisa BE të marrë një vendim, për të pasur sundim të ligjit. Ata e duan tani. Ata e donin një vit më parë. Ata e donin katër vjet më parë. Ata e donin 30 vjet më parë. Ka ardhur koha. Ka ardhur koha. Mjaft me lojra”!, shprehet ambasadorja Kim.
Ndërkohë, intervista e plotë do të transmetohet sonte në mbrëmje, ora 18:00, te “Zëri i Amerikës”.
