Ambasada Amerikane mbështet me forcë zbatimin e ligjit për dekriminalizimin. Përmes një deklarate për mediat, ambasada amerikane sqaron se ekspertët e SHBA bënë sot një prezantim mbi praktikat e suksesshme në Amerikë, për të zhvilluar më tej aktet nënligjore të dekriminalizimit. Në deklaratë theksohet edhe një herë rëndësia që paraqet ky ligj për dekriminalizimin e politikës duke veçuar rëndësinë e akteve nënligjore që e bëjnë funsksional këtë ligj.
“Sot, ekspertë teknikë nga Shtetet e Bashkuara bënë një prezantim në parlamentin shqiptar mbi praktikat më të suksesshme në SHBA për hetimin e të kaluarës së zyrtarëve në qeverisje dhe udhëheqësve politikë. Prezantimi u organizua nga Ambasada e SHBA, në mbështetje të përpjekjeve të Shqipërisë për të zbatuar ligjin e dekriminalizimit të miratuar së fundi. Ambasada mirëpret përpjekjet e parlamentit për të zhvilluar më tej aktet nënligjore të këtij ligji të rëndësishëm, dhe mbështet me forcë zbatimin e plotë të ligjit për dekriminalizimin.”
Ambasadori amerikan i SHBA-së në Tiranë, Donald Lu, ka përsëritur disa herë domosdoshmërinë e pastrimit të politikës dhe administratës nga personat me të shkuar kriminale.
