Nga Ilir Seci
Fejton
“Mund të pushoni tash që po hyjmë në diskun e Udhës së Tamlit, sepse kurrgja interesante nuk ka këtu” – u tha kapiteni i diskut fluturues, astronautëve alienë që ishin në bord. Mbasi pushoi pak vazhdoi : -“Këtu në diskun e Udhës së Tamlit ma saktë në Krahun e Orionit, në fakt gjindet nji sistem diellor, por kurrgja me interes nuk ka aty!”
-“Zotni Kapiten! Ne jemi në mision për me gjetë jetë inteligjente e kompjuterat tanë po kallzojnë se paska diçka të tillë në planetin Tokë.” – murmuriti tanë ndrojtje nji mvartës i kapitenit…
-“Jetë inteligjente në planetin Tokë!” – qeshi Kapiteni, – “Lene pashë besën mos bani shaka! Çfarë inteligjence në Tokë!?”
-“Po zotni Kapiten, – ngulmoi mvartësi, – “kompjuteri po kallzon se në Tokë janë ngritë qytete të medha, po shihet që fluturojnë me avionë e bile paskan mbërri me prodhue edhe armë bërthamore! Kjo dishmon se disa qenie në Tokë janë qenie inteligjente!”
-“Paskan prodhue armë bërthamore këto qenie e kjo i ban inteligjente simbas kompjuterit a?” – tha Kapiteni e brofi nga ndenjësja, -“Kaq qenie inteligjente janë sa raketat bërthamore ia kanë drejtue njani-tjetrit! Kqyrni mirë se i dalloni si janë t’u mbytë gra e fëmijë me gaz sarin në Siri! E ju më folni për inteligjencë… Këto qenie gjithshka munden me qenë, por vetem inteligjente kurrë!”
I nxehun Kapiteni i mëshoi me grusht tavolinës …
-“Qenie inteligjente! Lene pashë besën inteligjenca e madhe që kanë…Në Kosovë kanë President Hashim Thaçin e në Shqipni kryeministër Edi Ramën e ju me përmendni inteligjencë!” – vikati Kapiteni i bamë tym.
