Kreut të departamentit të Rendit dhe Sigurisë, Enkelejd Alibeaj, akuzon ministrin e brendshëm për lidhje me botën e krimit
Kreut të departamentit të Rendit dhe Sigurisë, Enkelejd Alibeaj, ka akuzuar ministrin e brendshëm se ka biseduar me Emiljano Shullazin, përmes telefonit të nëndrejtorit të policisë Tiranë, Ermal Muça. Në një deklaratë për mediat, Alibeaj foli për detaje të atyre ditëve kur u arrestua Emiljano Shullazi, i akuzuar për gjobëvënie e kanosje. Alibeaj akuzon rëndë ministrin e brendshëm Saimir Tahiri, kur deklaron se Tahiri e ka garantuar Shullazin, se thjesht do të shoqërohej do të pyetej për kërcënimin e kandidatit per rektor, e më pas do lihej i lirë.
“Pakti u prish, sepse prokuroria urdhëroi arrestimin për akuzat e gjobvënies e kanosjes, pas punës disa mujore që kishte bërë për sigurimin e provave, sigurisht pa dijeninë e Tahirit.
Burime serioze, oficerë që janë në dijeni dhe që kanë qenë prezentë në aksion, dëshmojnë se Sajmir Tahiri ka folur me Emiliano Shullazin përmes telefonit të nëndrejtorit të policisë së Tiranës, Ermal Muça.
Ky funksionar i policisë rezulton të jetë një nga personat e besuar për shumë paligjshmëri e trafiqe që bëhen me dijeninë dhe bekimin e Tahirit.
Nëse prokuroria merr pamjet e dy muajve të fundit të lokalit ku ndodhi ekzekutimi i Elton Çiços, do të shohë se pothuajse çdo natë Ermal Muça dhe Qebini i doganave ishin në shoqërinë e viktimës. Dhe të gjitha këto lidhje përfshijnë Shullazin e të çojnë tek Tahiri.
Eshtë kjo arsyeja pse arma dhe telefoni i viktimës u morën natën e krimit. Sepse arma dhe sidomos telefoni zbulojnë lidhjet me krerët e policisë dhe janë provë e dëshmi e trafiqeve të drogës”, tha Alibeaj.
