Një i ri algjerian është sulmuar me thikë në Kosovë dhe vijon të rrijë i fshehur nga sulmuesit e tij.
Siç raportojnë mediat algjeriane, ai i ka bërë thirrje autoriteteve të vendit të tij që ta kthejnë në shtëpinë e tij.
Mohamed Soussi erdhi në mënyrë klandestine në Kosovë, së pari duke kaluar nëpër Turqi, Greqi, pastaj Shqipëri, para se ta përfundonte udhëtimin e tij duke u bllokuar në Kosovë.
Përmes një video që është shpërndarë gjerësisht, ai ka treguar tmerrin që po përjeton pasi ka qenë viktimë e një sulmi dhe tani jeton me ndihmën e disa bamirësve.
Situata e tij paraqitet vërtetë kritike, ndërsa përgjërohet që të kthehet në vendin e tij.
Mohamed Soussi vazhdon ta shpjegojë situatën e tij dhe tregon se ai jeton falë ndihmës së një grupi algjerianësh që i sollën lëng frutash dhe që e fshehën në një dhomë lutjesh, në mënyrë që atë të mos e gjejnë sulmuesit e tij, të cilët me sa duket e ndjekin ende.
“Unë kërkoj nga autoritetet algjeriane të ndërhyjnë dhe të më kthejnë në vend. Kjo është gjithçka që unë kërkoj. E gjitha. I kërkoj ministrit të Jashtëm, Boukadoum, të më çojë në shtëpi, për hir të Zotit, sepse nuk mund të duroj më!”- dëgjohet të thotë ai në video.
Mesazhi iu dërgua ministrit të Punëve të Jashtme në Algjeri, Sabri Boukadoum.
