Aleatët e Partisë Demokratike i kanë dërguar ditën e sotme një letër Komisionit Qendror të Zgjedhjeve me qëllim që të nisë procedurat për 13 tetorin e datën e dekretuar nga Presidenti i vendit, Ilir Meta për zgjedhjet lokale.
Mësohet, kreu i PAA Agron Duka, Fatmir Mediu i partisë Republikane dhe Monika Kryemadhi e LSI, i kanë kërkuar KQZ-së nisjen e proceduarve për zgjedhje të reja.
Burime nga PD konfirmojnë se qëndrimi që ka ndarë Kryetari i Opozitës gjatë takimit me aleatët është se KQZ e ka detyrim të pashmangshëm të përgatisë zgjedhjet e 13 Tetorit.
“Shteti dhe partia janë dy gjëra të ndryshme.
Ka një ndryshim rrënjësor midis të drejtës kushtetuese dhe të drejtës partiake.
I vetmi akt me fuqi kushtetuese në lidhje me zgjedhjet është dekreti i Presidentit për zhvillimin e zgjedhjeve më 13 tetor.
Është detyrim i pashmangshëm dhe i padiskutueshëm i KQZ-së dhe institucioneve të tjera shtetërore të përgatisin infrastrukturën për këto zgjedhje.
Partitë politike, pastaj, kanë të drejtën e tyre të marrin apo jo pjesë në këto zgjedhje”, eshte shprehur kreu i opozites, Lulzim Basha.
