Mesila Doda i është përgjigjur akuzave të kryedemokratit Lulzim Basha në lidhje me votën e PDIU për ujin e pijshëm në Këshillin Bashkiak.
Doda i kujton Bashës të bëjë detyrën e tij në opozitë, ndërsa shton se ai ende vijon bashkëqeverisjen me shumicën.
Doda nënvizon se falë bashkëqeverisjes Basha-Rama u vodhën 3 mandate të PDIU. Ajo thotë se mandati i kësaj force vlen 25.000 vota, duke e bërë krejt të pabarabartë dhe diskriminuese garën.
Si të vetmen opozitë që heshti kur u pa hapur vjedhja e votave të PDIU, e cilëson Doda PD duke shtuar se Basha ashtu si gjatë gjithë fushatës nuk godet ata që janë në qeveri, por ato që nuk janë në qeveri.
Reagimi i plotë i Dodës
Kryetari i PD, ende në bashkëqeverisjen e lugës së 18 qershorit, sot akuzoi PDIU për votën e saj në Këshillin Bashkiak.
Më së pari duhet t’i kujtoj bashkëkryetarit të qeverisë që duhet të kalojë në opozitë, të bëhet lider i PD, e më pas të kërkojë të bëhet lider i opozitës.
Më duhet t’i kujtoj se sot falë pazareve të tij me bashkëkryetarin tjetër të qeverisë, një mandat i PDIU vlen 25.000 vota, duke e bërë krejt të pabarabartë dhe diskriminuese garën mes nesh dhe partive të tjera.
Duhet t’i kujtoj që falë pazarit të tij të natës së 18 qershorit dhe abuzimit me ligjin e kodin zgjedhor sot PDIU i janë vjedhur 3 mandate dhe kanë shkuar në kosh 40.000 vota, duhet t’i kujtoj se nuk e tha një fjale e heshti si fija e barit kur PDIU kërkoi hapjen e kutive të Tiranës duke parë vjedhjen flagrante të mandatit të saj në Tiranë, por votoi pro moshapjes së kutive duke u bërë e vetmja opozitë në botë që nuk kërkon e nuk do transparencë.
Sot vazhdon ende teatri i rradhes, ashtu si gjatë gjithë fushatës nuk godet ata që janë në qeveri, por ato që nuk janë në qeveri dhe në fund fare si gjithmonë… fajin e kanë të tjerët…
