3 persona kanë humbur jetën dhe tre të tjerë janë plagosur si pasojë e një aksidenti tragjik në Patra-Pyrgos në Greqi
Policia bën me dije se një kamion ka rrëshkitur dhe ka përplasur ballë për ballë një kamionçinë. Si pasojë 51 vjeçari grek dhe dy shqiptarë kanë mbetur të vdekur në vend. Ata janë Hava Majko, 49 vjeç, dhe Neim Qamili, 48 vjeç, banorë të fshatit Vartolomio të Prefekturës së Pyrgosit.
Të plagosur mbetën dy shtetas të tjerë shqiptarë, një femër 31 vjeç dhe një 40-vjeçar.
Burimet lokale bëjnë me dije se aksidenti ndodhi pasi semaforët nuk punonin, ndërsa kamioni që shkaktoi aksidentin po ecte me shpejtësi jashtë normave të lejuara.
Aksi Patra-Pyrgos konsiderohet si një ndër akset më të rrezikshme në vend, pasi në këtë zonë fushore të Peloponezit, rruga është e drejtë dhe e gjerë, në të lëvizin shumë mjete bujqësore, ndërsa automjetet shpesh tejkalojnë shpejtësinë e lejuar.
