Partia Agrare Ambientaliste i bashkohet Partisë Demokratike në vendimin për të bojkotuar për dhjetë ditë parlamentin. Kryetari i PAA, Agron Duka, tha gjatë takimit me strukturat në Korçë se jo për faj të opozitës, po për shkak të mazhorancës nuk arrihet një gjuhë komunikimi. “Prandaj edhe opozita ka marrë vendimin që gjatë këtyre 10 ditëve kur është i përjashtuar zoti Berisha me të padrejtë të mos marrë pjesë por të bojkotojë punimet e Parlamentit.
Partia Agrare Ambientaliste bashkohet me Partinë Demokratike në bojkotin e Parlamentit për 10 ditë. Natyrisht bojkoti nuk është gjëja më e mirë që mund të bëjmë por kur kjo diktohet dhe kur nuk ka rrugë tjetër, atëherë kjo është rruga e vetme. Unë uroj që mazhoranca dhe opozita të mundohen të gjejnë gjuhën e përbashkët ndërmjet tyre në mënyrë që nëpërmjet realizimit të reformave të domosdoshme jo vetëm për politikën por për gjithë shqiptarët siç ështe ajo e drejtësisë dhe reforma zgjedhore të mund të bëjnë që ky popull të ecë akoma më shumë përpara”, tha Duka.
