Kryeministri Edi Rama njoftoi ditën e sotme krijimin e Agjencisë së “Ballkanit të hapur” për investimet e huaja”.
Në konferencën e përbashkët për medie në mbyllje të samitit të “Ballkanit të hapur”, Rama u shpreh optimist për marrëveshjet e nënshkruara në kuadër të kësaj nisme, ndërsa theksoi se “nuk jemi të kënaqur sepse ka shumë akoma potencial”.
“Kemi firmosur marrëveshje të tjera. Jemi realisht optimist, nuk jemi të kënaqur se ka shumë potencial, por kemi rritje të vëllimit tregtar mes vendeve tona, rritje të hapësirave. Ne duam të fusim tani edhe elementin e zgjerimit të hapësirës së investimeve duke bashkuar eksperiencat tona dhe duke krijuar një agjenci të përbashkët të investimeve, një ombrellë më saktë, pasi agjencitë tona do të jenë autonome. Por njëkohësisht do të jenë në një ombrellë, Agjencia e ‘Ballkanit të hapur’ për investimet e huaja.”
Nga ana tjetër, kryeministri shtoi se “Ballkani i hapur” është zgjedhja e vetme që kanë bërë.
“Ritheksoj edhe njëherë. Dje ka qenë dita më e bukur e ‘Ballkanit të hapur’, mund të kishte qenë një ditë tipike e keqe për Ballkanin në tërësi dhe në vend se të hapnim dyert për njerëzit e punës, për njerëzit e tokës, njerëzit e prodhimit të ushqimit dhe për shumë të tjerë nga e gjithë bota, mund t’i kishim hapur dyert një lajmi tjetër të keq për tension, konflikt, rrezik lufte e të gjitha me radhë. Fatmirësisht ka ndodhur e para. Ky është ‘Ballkani i hapur’ dhe kjo është zgjedhja që kemi bërë. Të shikojmë përpara të afrojmë sa më shumë njerëzit me njëri-tjetrin, të kuptojmë sa më mirë njerëzit me njeri-tjetrin dhe ‘të futemi në këpucën e tjetrit’ dhe gjërat që kemi për të zgjidhur t’i zgjidhim me durim, me mirëkuptim”.
