Vetëm 2 ditë na ndajnë nga super sfida e madhe e boksit mes Floyd Mayweather dhe Conor McGregor, një nga duelet më të mëdha të sporteve luftarake, por që do të përballë dy kampion që vijnë nga sporte të ndryshme.
Las Vegas do të jetë ai që do të presë mijëra tifozë, mes të cilëve shumë personazhe të “showbizz”-it, mbrëmjen e 26 gushtit.
Kjo është beteja e një prej boksierëve më të fortë të të gjitha kohërave Floyd Mayweather, si dhe yllit të padiskutueshëm të arteve mikse marciale Conor McGregor. Të dy rivalët do të përdorin doreza boksi dhe nuk do të mund të përfshijnë lëvizjet klasike marciale dhe të palejuara në ring. Kjo e bën favorit të padiskutueshëm boksierin amerikan, Mayweather.
Shifrat për të asistuar në takimin spektakolar dhe unik në histori përfshijnë një xhiro milionash, sponsorësh dhe menaxherësh, si asnjëherë tjetër. Një biletë për të parë ndeshjen në arenën e Las Vegasit, në 12 raunde nëse do të zgjasë kaq shumë, kushton nga 500 deri në 40 mijë dollarë. Një shifër e kripur edhe për amerikanët që do të duan ta shijojnë nga ekrani i vogël, pasi për të do të paguajnë 90 dollarë.
Në Angli, kjo ndeshje mund të blihet nga platformat për 20 paund. Por ka dhe një interes të madh mbi fitimet e dy kampionëve. Mayweather do të fitojë 100 milionë dollarë, ndërsa McGregor do të shtojë 75 milionë në llogaritë e tij bankare. Këto janë shifra të rakorduara më parë dhe nuk bazohen te rezultati i sfidës.
“T Mobile Arena” do të jetë një makinë parash më vete, pasi parashikohen 600 milionë dollarë fitim nga sponsorët dhe të drejtat televizive.
