Tritan Shehu, ish-deputeti i Partisë Demokratike, shprehet se Shqipëria është jashtë rrezikut nga kërcënimet e Iranit për sa kohë qëndron afër Shteteve të Bashkuara të Amerikës.
Lidhur me deklaratën e liderit supreme të Iranit, Ali Khamenei, Shehu e cilësoi atë një deklaratë shumë të gabuar dhe të papërshtatshme.
“Përmendi Shqipërinë, Shqipëria mund të jetë një vend i vogël, por është në rrënjët e Evropës, ka vlera të mëdha. Është një vend që ka luftuar gjithmonë të jetë në anën e Evropës dhe të perëndimit. Unë do ta konsideroj të papranueshme një shprehje të tillë, një provokacion të tillë ndaj popullit shqiptar sepse Shqipëria është e qartë në rrugën e saj të demokracisë.
Kush bën deklarata të tilla gabon rëndë dhe së paku nuk di realitetin në Shqipëri. A rrezikon Shqipëria? Kjo pyetje është bërë shpesh. Shqiptarët duhet të ishin të shqetësuar dhe të ndjenin veten të pasigurt nëse do të ishin larg SHBA. Sa më afër me SHBA, aq më të mbrojtur jemi”, u shpreh Tritan Shehu.
Sa i takon qëndrimit të mbajtur nga Shqipëria për vrasjen e gjeneralit iranian, ish-ministri deklaroi se ai është një qëndrim i drejtë. Megjithatë, ai kritikoi kryeministrin Edi Rama se ka reaguar me vonesë.
“Shqiptarët absolutisht duhet të reagojnë me forcë duke dhënë modelin e mbështetjkes dhe qëndrimit afër SHBA. Kjo nuk është detyrë vetëm e shqiptarëve, por e gjithë botës demokratike. Sepse çdo e çarë që mund të krijohet nxit forcat ekstreme që duan të godasin SHBA. Është moment kur gjithë bota duhet të jetë në krah të SHBA. Kjo është një domosdoshmëri absolute.
Reagimi i kryeministrit shqiptar ka qenë i vonuar, u bë pas reagimit të zotit Berisha. U duk sikur ishte reagimi i zotit Berisha që e detyroi të reagonte. Reagimet që ka patur në media, kanë qenë aktivë politikanët e opozitës, kryetari Basha, por kanë munguar reagimet e politikanëve të PS që merren me politikën e jashtme. Pse ndodh një gjë e tillë? Duhet dhënë një përgjigje”, deklaroi Tritan Shehu.
