Deputeti demokrat Gazment Bardhi ka dhënë sot më shumë detaje lidhur me sherrin që pati në Kuvend me Edmond Saphon dhe Tritan Shehun. Shkak për këtë përplasje ishte përmendja e një vile luksoze në Lalz, për të cilin Bardhi tha se i përket një anëtari të Rithemelimit. Kështu pyetjes nëse ka fakte që kjo vilë i përket vërtet ndonjë nga deputetëve të PD, Bardhi u shpreh se ka prova të mjaftueshme që ajo vilë i përket njërit nga kolegëve të partisë.
“Vila i përket kolegut tim në bashkëpronësi me dikë tjetër. Për shkak të detyrës time si Sekretar i PD kam më shumë informacione se çdo tjetër”, tha ai
Më tutje Bardhi foli për thirrjen e Tritan Shehut, që nëse ka prova duhet të shkojë në prokurori, në të kundërt duhet të merret si i pandehur për fshehje krimi. Lidhur me këto deklarata të Shehut, Bardhi i ka kujtuar kolegut të tij akuzat e bëra nga Halim Kosova gjatë kohës që ishte Ministër Shëndetësie, i cili akuzonte Shehun se i kishte ndërhyrë në një tender me vlerë 100 mijë euro, por që kërkonte t’ia jepte dikujt tjetër për 600 mijë euro.
“Së pari unë çfarë kam patur për të thënë e kam thënë. Kam dëgjuar një koleg që do duhet të më thërrasë, prokuroria, jam i gatshëm të shkoj. Halim Kosova ka akuzuar Tritan Shehun që zoti Shehu i ka ndërhyrë që një tender që ka kushtuar 100 mijë euro t’ia jepte një tjetri për 600 mijë euro. Do të doja që të njëjtin qëndrim zoti Shehu të kishte dhe për këtë akuzë”, tha ai.
