Kryeministri Edi Rama pak ditë para prezantimit të qeverisë së re ka zhvilluar një takim me ambasadorët shqiptarë nëpër botë.
Në fjalën e mbajtur, kreu i qeverisë nuk ka kursyer kritikat e ashpra ku e cilësoi punën e tyre të dobët në raport me ekonominë e vendit.
Kryeministri foli për diplomatë parazitë dhe delenxhinj ndërsa paralajmëroi ambasadorët për shkarkim nëse gjendja nuk ndryshon brenda vitit.
“Cdo tre muaj dua nga një raport, pasqyrë për secilën përfaqësi diplomatike të vendit në raport me ekonominë.
Duhet të nisim planin kombëtar të Diplomacisë në Ekonomi për dekadën e ardhshme për investimet e huaja dhe shkëmbimet tregtare.
Nuk na duhen diplomatë të rraskapitur, nuk na ndihmojnë diplomatë që ke dëshirë t’i harrosh sapo u kthen shpinën.
Është bërë goxha pastrim në këto katër vite nga parazitët në përfaqësitë tona, por ende kemi diplomatë delenxhinj dhe parazitë.
Ka akoma në radhët e shoferëve të ambasadave që gjendet ndonjë ‘kallcak’. Duhet të jemi të organizuar për të vendosur vendin dhe planet e zhvillimit përpara të gjithë syve të të huajve.
Duhet organizim mes shërbimit të jashtëm, ministrisë bazë dhe ministrive dhe agjencive të tjera.
Vitin e ardhëm do të jetë gjysma e sallës nëse ambasadat nuk do të justifikojnë arsyen e ekzistencës së tyre. Nuk i pranoj teoritë mbi nevojën e ambasadave që vetëm harxhojnë.
E gjithë qeverisja që nga qeveria e re, do të ngrihet mbi parimin; më shumë me më pak. Ky parim do të jetë edhe për sektorët e tjerë.
Nuk kemi se përse shtojmë ambasadat, por të shtojmë kontaktet. Duhet një përmbysje e madhe të shërbimit diplomatik në funksion të zhvillimit të vendit, na duhet kreativitet dhe pragmatizëm, që sot janë të fjetura” deklaroi Rama.
