Vera po mbaron dhe studentët duhet të mendojnë për t’iu kthyer shkollës. Një moment i tillë mund të jetë i këndshëm sepse shkolla na bën më aktivë, na njeh me njerëz të rinj dhe na ofron dije, por për disa studentë është një fillim ose rifillim i vështirë. Shumë studentë zgjedhin të fillojnë studimet jashtë qyteteve ku banojnë me familjen dhe fillimi i i Universitetit sjell dhe probleme si gjetja e vendbanimit të ri, shpenzimet e ndryshme udhëtimin, ushqimin, librat etj.
Në një moment të tillë studentët që lëvizin nga qyteti i tyre ndeshen me situata që ndoshta nuk janë detyruar t’i përballojnë më parë. Të jetuarit vetëm dhe detyrimi për të menaxhuar paratë për muajin, përfshijnë përballjen me qeranë , me fatura dritash, fatura uji, libra të reja, shpenzime për ushqim, veshmbathje etj.
“Erdha në Tiranë dhe duhej të gjeja një vend për të jetuar dhe nuk e kisha idenë ku të kërkoja. Gjeta një vend në periferi që të shmangia shpenzimet e tepërta” – thotë Adjen Markola, student në Fakultetin e Drejtësisë.
“U bënë 5 vite që jam në Tiranë për të përfunduar arsimin e lartë dhe shpenzimet kanë qenë të shumta. Jetoj në konvikt sepse kjo ishte alternativa më e përshtatshme për gjendjen time ekonomike. Ajo që më ka mbetur në mendje që nga fillimi i shkollës është momenti kur në shtëpi diskutohej nëse unë do vazhdoja apo jo arsimin e lartë sepse familja nuk kishte mundësi ekonomike” – thotë studentja Jeta Pera.
“Nuk mund të mohojmë dot faktin se ka shumë pedagogë të cilët na e bëjnë kriter blerjen e librave të tyre sepse pastaj nuk te japin lëndën. Edhe fotokopjet kushtojnë gjithashtu” – shton Pera.
“Pedagogët kanë vendosur çmime të kripura të librave dhe imponojnë blerjen e tyre, në mënyrë të drejtpërdrejtë ose të tërthortë. Ndalojnë rreptësisht fotokopjimin për të respektuar të drejtën e autorit dhe më pas persekutojnë studentët se nuk iu binden” – konfirmon pedagogu i Fakultetit të Shkencave Sociale, Arlind Qori.
Shqetësimet janë të shumta dhe të përjetuara nga shumë studentë. E njejta situatë është çdo vit, duke shtuar këtu edhe tarifat gjithnjë e në rritje të Fakulteteve. Pavarësisht pengesave, studentët vazhdojnë përpjekjet drejt dijeve dhe familjet vijojnë sakrificat për të mundësuar arsimimin e tyre.
/rrathë/
