Kryeministri premton mbështetje direkte për bujqësinë: Fondi Kombëtar i Garancisë në bujqësi prej 300 milionë euro do të ofrojë mbështetje për kreditim nga bankat
“Tani duam të çojmë më përpara procesin e mbështetjes direkte për bujqësinë. Për 10 ha sera ne do të japim 100 mijë dollarë në 5 vjet. Për 100 ha fermë, do të japim 1 milion dollarë në 5 vjet, direkte”. Ky është premtimi i bërë sot nga kryeministri Rama gjatë vizitës në një fermë në Lushnje. Kryeministri tha gjithashtu se Fondi Kombëtar i Garancisë në bujqësi prej 300 milionë euro do të ofrojë mbështetje për kreditim nga bankat.
“Tani të gjithë kanë në dispozicion Fondin e Garancisë shtetërore për të marrë kredi nga bankat e nivelit të dytë, me interesa shumë më të ulëta sesa ato të zakonshme dhe e gjitha kjo i dedikohet bujqësisë. Janë 300 milion euro potencialisht që mund të shfrytëzohen nga të gjithë prodhuesit, agropërpunuesit, apo të gjithë ata që duan të hyjnë në këtë sektor. Nuk do të jetë fermeri apo prodhuesi që do të shkojë tek banka, por do të jetë AZHBR që do të aplikojë për t’ia lehtësuar plotësisht fermerit”, tha Rama. Në këtë vizitë në fermat e Lushnjes, rama shoqërohej nga Ministri i Bujqësisë Edmond Panariti.
