Çamëria është kauzë që nuk do zhduket kurrë.
Për të parën herë gjatë fushatës deputetja e PDIU Mesila Doda është shfaqur në televizion me një t-shirt të Çamërisë.
Respekti për familjen e saj, e cila i përket këtij komuniteti që vijon luftën për të drejtat e tij, si dhe vlerësimi për kauzën çame e kanë shtyrë deputeten që këtë herë ta japë mesazhin e saj në këtë formë.
Por, listës së arsyeve të shumta se përse Doda pati këtë lloj paraqitje, i shtohet nevoja e rëndësishme që çdokush që shqetësohet për gurët e Çamërisë në sheshin kryesor të vendit, ta ketë të qartë që kjo kauzë nuk do të zhduket kurrë.
“Hera e parë që kam veshur t-shirt sot, është një nga bluzat që ne kemi në fushatë dhe e kam veshur edhe për të respektuar kauzën tonë kryesore, në respekt të familjes sime sigurisht, por edhe për t’i dhënë të kuptojnë të gjithë atyre që mendojnë se mund të vendosin emrat e qyteteve shqiptare në muret e parlamenteve dhe të kenë hallin e gurëve te Çamërisë se mos janë te sheshi ynë kryesor që Çamëria është kauzë, e cila nuk do zhduket kurrë, sepse padrejtësitë historike nuk zgjidhen duke bërtitur e duke bërë arrogantin, por duke ju drejtuar institucioneve të së drejtës”, ka deklaruar Doda në emisionin “45 minuta” në Report TV.
