Presidenti i Kosovës për Zërin e Amerikës: Do respektoj Kushtetutën
Presidenti i zgjedhur i Kosovës, Hashim Thaçi, në një intervistë për Zërin e Amerikës tha se do të punojë me të gjitha forcat politike për të tejkaluar ato që quajti dallime ndërmjet tyre. Në intervistën dhënë për Zërin e Amerikës ai tha se zgjedhja e tij, që u përcoll me kundërshtimet e opozitës, ka ndodhur në pajtim me kushtetutën e ligjet e vendit, ndërsa mohoi të ketë bërë lëshime ndaj përfaqësuesve të komunitetit serb në këmbim të votës së tyre. Ai tha po ashtu se në Kosovë nuk ka asnjë mëdyshje rreth ngritjes së Gjykatës së Posaçme për krime lufte.Presidenti Thaçi premtoi se do t’iu shërbejë qytetarëve pa dallim ideologjie duke respektuar institucionet. “Presidenti i ri është lideri që ka fituar gjashtë herë zgjedhjet. Do jem në shërbim të të gjithëve, do të respektoj Kushtetutën. Nuk kam paragjykim ndaj askujt do të punoj për të dëgjuar opozitën”, ka thënë Hashim Thaci për Zërin e Amerikës.
