“Zërat për një Shqipëri të Madhe, forcimi i grupeve ekstremiste islamike apo i kapadainjve që nxjerrin pretendime të ndryshme për Greqinë, funksionojnë në dëm të vetë Shqipërisë…”
Kështu ka deklaruar ministri i Mbrojtjes, Panos Kammenos, i cili i është referuar mediave greke që kanë rinxjerrë në skenë skenarët për të ashtuquajturën “Shqipëri e Madhe”.
Gjatë një interviste për televizionin SKAI, Kammenos tha se Shqipëria duhet ta kuptojë se është në interes të saj të ketë marrëdhënie të mira me Greqinë.
“Natyrisht, Shqipëria duhet të vijë të bisedojmë. Të flasim edhe për të drejtat e voriepirotëve. Dhe, nëse ka interesa të Shqipërisë, mund t’i diskutojmë, por jo çështje që kanë përfunduar qysh në Luftën e Dytë Botërore, si Çështja Çame”, tha Kammenos.
Ministri i mbrojtjes theksoi se Greqia është në favor të mos ndryshimit të kufijve. Mirëpo ka shtuar që “nuk do t’i lemë të pambrojtura popullatat kristiane apo të lejojmë shkeljen e të drejtave njerëzore të tyre.
Garanci për Perëndimin është krijimi i një boshti kristian që të mos përhapen grupet ekstremiste islamike”, ka thënë Kammenos, duke shtuar se Athina po diskuton paralelisht me izraelitët, arabët dhe libianët në jug, si dhe me bullgarët, rumunët e serbët në veri.
