“Për 27 vjet s’e kam menduar që mund të shkonim në një vendim të tillë për bojkot zgjedhjesh, por do respektoj vendimin e grupit parlamentare dhe të zotit Basha.”
Deputeti i Partisë Demokratike, Igli Cara ishte pjesë e debatit në mbledhjen e grupit parlamentar, e cila përfundoi pak minuta më parë. Ai është bërë pjesë e debatit duke i kërkuar kryetarit të PD-së të ndalë ushtrinë e atyre që sulmojnë nëpër rrjetet sociale deputetët si Jozefina Topalli, Majlinda Bregu apo Eduard Selami, vetëm pse ata mendojnë ndryshe dhe kërkojnë të ndalin bojkotin e zgjedhjeve.
“Në të gjitha rastet do t’i qëndroj vendimit të grupit parlamentar të PD-së dhe të zotit Basha dhe nëse do jetë për mospjesëmarrje në zgjedhje, ndonëse në 27 vjet anëtar i PD nuk e kisha menduar që mund të shkonim në një vendim të tillë politik… …vendimi ynë përfundimtar për zgjedhjet duhet të merret vetëm pasi te kemi shteruar çdo negociatë. …Linçimi publik i drejtuesve si Jozefina Topalli nga njerëz që nuk përfaqësojnë asgjë në PD, është një gjë që duhet ndalur urgjentisht”, është shprehur Cara.
