Përjashtimi i Shpëtim Idrizit nga komisioni fillestar ad hoc i vettingut është shoqëruar me një debat të fortë mes tre partive të mazhorancës në Konferencën e Kryetarëve.
Publikohet procesverbali i plotë i mbledhjes së datës 11.04.2017, ora 17.45, ku kryetarja e Komisionit të Ligjeve, Vasilika Hysi argumenton se PDIU nuk mund të marrë përfaqësues në emër të shumicës, pasi ajo është pakicë nga zgjedhjet parlamentare dhe nuk ka ministër në qeveri.
Këtë ide e mbështet edhe kreu i grupit socialist, Gramoz Ruçi, i cili i thotë Idrizit se nuk mund të barazohet me të. Por, ndryshe nga PS, LSI, përmes kryetarit të grupit Luan Rama thotë se, nëse do të quhet PDIU pakicë, kjo do të ishte një vetëvrasje e procesit. Në fund, në mungesë të konsensusit, emrat u votuan në Kuvend, ku PS dhe LSI e rrëzuan Idrizin.
Debati i plotë
Ilir Meta – Menduam të thërrasim Konferencën e Kryetarëve para kësaj seance. Në rendin e ditës kemi: 1. Projektvendimin “Për procedurat parlamentare për funksionimin e komisioneve ad hoc dhe realizimin e procesit të votimit sipas ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”. 2. Projektvendimin “Për krijimin dhe përbërjen e komisionit ad hoc për verifikimin e kandidatëve për institucionet e rivlerësimit sipas ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”. Kemi ndonjë merak për këto vendime? I patë, Vasilika?
Vasilika Hysi -Po, po.
Shpëtim Idrizi – Unë kam një problem…
Ilir Meta – Po, zoti Idrizi.
Shpëtim Idrizi – Unë kam një problem, zoti Kryetar, për pozicionin e PDIU-së. Ju u keni dërguar një letër të gjitha grupeve parlamentare për të dërguar përfaqësuesit e tyre në Komisionin e Vetingut. E kemi paraqitur ne si PDIU. Unë shoh këtu që Partia Socialiste ka depozituar 2 anëtarë, LSI-ja 1 anëtar dhe ne 1 anëtar. Ndërkohë që maxhorancës i takojnë 3. Në një interpretim që ne kemi bërë edhe me juristët, unë nuk e di, janë 4 kandidatura, do të hidhen 4 kandidatura dhe do të miratohen 3 kandidatura, sepse në logjikën me të cilën të paktën unë sot jam konsultuar, i bie që në qoftë se janë 3 partitë, 3 grupet parlamentare të maxhorancës përfaqësohen me nga një. Në qoftë se do të ishin 4-5, atëherë cila parti ka më shumë ata duhet të ishin përfaqësuar. Nuk e di, nuk e shoh projektvendimin se si është bërë. Si është parashikuar? Do të jepen 4 kandidaturat, 3 apo…
Alban Brati – Te votimi duhet të përcaktohet orientimi politik, cila është maxhorancë dhe cila opozitë.
Ilir Meta – Nuk i keni diskutuar këto gjëra?
Alban Brati – Jo, nuk i kemi diskutuar këto gjëra.
Vasilika Hysi – Kjo është e 21 korrikut, është histori tjetër. …sepse është çështje kushtetuese.
Shpëtim Idrizi – Unë dua të sqaroj këtu pozicionin dhe çfarë do të votojmë.
Ilir Meta – Si është menduar procesi i votimit? Flas teknikisht.
Alban Brati – Nuk ka ndonjë gjë të përcaktuar as Kushtetuta, as ligji, zoti Kryetar, por vetëm thotë përbërjen e këtij komisioni, i cili duhet të përbëhet nga tre anëtarë të pakicës dhe tre anëtarë të shumicës.
Shpëtim Idrizi – Ne, maxhoranca ka katër kandidatura, si do t’i vëmë katër për tre?
Vasilika Hysi – Kushtetuta nuk e thotë, por teoria e të drejtës kushtetuese përcakton se cila është shumica parlamentare dhe pakica parlamentare. Shumicat dhe pakicat parlamentare janë të përcaktuara në momentin kur bëhen zgjedhjet dhe ne do t’u kthehemi mbrapsht zgjedhjeve të vitit 2013, si janë regjistruar grupet parlamentare… Në qoftë se, për shembull, një parti ka qenë në pakicë, deri në fund të mandatit të saj, ajo është pakicë, sepse ashtu regjistruar në KQZ. Në KQZ nuk thuhet se është shumicë. Në rast se kjo parti kalon nga pakica në shumicë dhe ka përfaqësim në nivel ekzekutiv, që është ministri, pra është dekretuar nga Presidenti, është votuar në Kuvend, ajo pastaj nuk quhet më pakicë, por quhet shumicë ose anasjelltas. Në qoftë se ka qenë shumicë dhe kalon në pakicë, do të marrë pozicionin e ri.
Luan Rama – Domethënë, Shpëtimi është opozita?
Vasilika Hysi – Është grup pakice. Më falni, në qoftë se lexojmë Kushtetutën nuk përdor termat “maxhorancë” dhe “opozitë”, por termat “pakicë” dhe “shumicë”. Kush është pakica dhe shumica? Po të shikoni vendimin e KQZ-së, rezulton se cilat parti kanë dalë nga ato zgjedhje të pakicës dhe të shumicës.
Shpëtim Idrizi – Tani ky është interpretimi juaj për pozicionin e PDIU-së. Të ky ligji i vetingut a thuhet si referencë se cila maxhorancë apo opozitë……
Vasilika Hysi – Jo, pakicë, shumicë…
Shpëtim Idrizi – E pra, e thotë ligji specifik për të cilin po flasim apo është interpretimi juaj në bazë të Kushtetutës?
Vasilika Hysi – Jo, është Kushtetuta.
Shpëtim Idrizi – Atëherë, Partia për Drejtësi, Integrim dhe Unitet është regjistruar në vitin 2015 në këtë koalicion të maxhorancës, është e përfaqësuar me zëvendësministra, me drejtorë të përgjithshëm dhe nënkryetari i Kuvendit është votuar nga maxhoranca dhe unë i jam përgjigjur thirrjes së Kryetarit të parlamentit edhe tani, edhe herën e kaluar, si pjesë e maxhorancës. Në qoftë se ju mendoni se sot do ta kaloni PDIU-në në pozicionin e opozitës, po ju them, e para, se ne nuk e pranojmë, sepse nuk mund të jetë çështje e interpretimit, por duhej të ishte çështje e ligjit; e dyta, besoj se nuk është rasti që dikush të emërojë nga opozita, nëpërmjet PDIU-së, anëtarin e katërt. Besoj se edhe…
Vasilika Hysi – Jo, opozitë.
Shpëtim Idrizi – Opozitë, pra.
Vasilika Hysi – Më falni, përdoren termat “pakicë”, “shumicë.
Shpëtim Idrizi – Jo, pra, qoftë edhe nga pakica. Unë sot po emërohem nga pakica, me këtë interpretim që po bëni. Ndërkohë që edhe në të gjitha konsultat që kam bërë, PDIU-ja e ka paraqitur kandidaturën e saj dhe ndihet pjesë e kësaj maxhorance. Ne jemi të përfaqësuar në qeveri me zëvendësministra dhe me drejtorë të përgjithshëm. Kemi votuar të gjitha qeveritë, ndryshimet e ministrave, sa herë që ka qenë e nevojshme… Nuk mund të jemi vetëm për këtë rast pakicë. Nuk po përdor fjalën “opozitë”. Aq më tepër që ky është një proces shumë i rëndësishëm dhe ne nuk mund ta bëjmë këtë gjë fetakompli dhe ne të marrim rolet e atyre që nuk na takojnë.
Besnik Baraj – Bie fjala, kjo 2+1, që është 2 PS dhe 1 LSI, që quhet shumicë parlamentare…
Vasilika Hysi – Ne kështu jemi regjistruar në KQZ.
Besnik Baraj – PDIU-ja a mund të marrë pjesë në atë treshen tjetër?
Vasilika Hysi – Po pra. Tani do të flasim me teorinë e së drejtës kushtetuese…
(Diskutime pa mikrofon.)
Spartak Braho – Ka një absurd këtu, që sikur nesër Rama të marrë një ministër nga këta…
Vasilika Hysi – Bëhet shumicë…, sepse zëvendësministri nuk është as votuar në parlament, qeveria, as nuk është dekretuar nga Presidenti. Si zëvendësministër mund të jetë edhe nga shoqëria civile, që s’është në parti, nuk i përket grupeve partiake. Tani kjo është teoria, Arta…
(Diskutime pa mikrofon.)
Arta Dade – Unë nuk kuptoj nga kjo anë, por po kuptoj që zëvendësministri është i barasvlershëm me ministrin, derisa shkon në kabinet, është përfaqësues politik.
Shpëtim Idrizi – Njerëzit e mi kanë qenë në mbledhje qeverie, zëvendësministrat kanë zëvendësuar ministrin. Tani ose mos i hyni kësaj gjëje, ose unë do ta tërheq kandidaturën, ose hajde ta studiojmë një herë më mirë, se kjo është shumë më e rëndë se kaq. Prandaj ju thashë, ne kemi që në vitin 2015, u bëmë pjesë e kësaj maxhorance dhe kemi hyrë bashkë në zgjedhje dhe ka një marrëveshje politike.
Vasilika Hysi – Po në vitin 2015 janë zgjedhje vendore.
Shpëtim Idrizi – Ndërkohë, jemi përfaqësuar me zëvendësministra që kanë qenë pjesë e mbledhjeve të qeverisë në pozicionin e ministrit kur ministri ka munguar dhe ua ka deleguar. Kemi paraqitur kandidaturën tonë në këtë sens, pra që jemi pjesë e shumicës. Tani, unë prandaj ju pyeta, ky është një interpretim që ju e bëni nga Kushtetuta, ndërkohë që unë doja të dija që ky ligji për të cilin ne po flasim, mbi të cilin është ndërtuar ky komision, e ka këtë koncept?
Vasilika Hysi – Zoti Idrizi, në rast se ecim me këtë logjikë, i bie që sa herë zoti Meta, kryetari jonë, largohet jashtë shteti dhe zëvendësohet në mbledhje nga një zëvendës, i bie që të jetë shumicë ose pakicë? Jo. Zoti Spaho e zëvendëson Kryetarin, por nuk është shumicë. Sepse ju thoni se kur mungon ministri në mbledhje e përfaqëson zëvendësministri. Kjo nuk është logjikë.
(Diskutime pa mikrofon.)
Valentina Leskaj – Nuk ka lidhje se është post politik, nuk ka lidhje me zëvendësministrat.
Arta Dade – Në shumicën e rasteve edhe këtu e zëvendëson Vali, nuk e zëvendëson Spaho…
Vasilika Hysi – Zoti Idrizi tha se ne kemi edhe përfaqësues nënkryetarë në Kuvend. Kuvendi është gjë tjetër, nuk ka lidhje…
(Diskutime pa mikrofon.)
Shpëtim Idrizi – Tani edhe unë jam nënkryetar nga shumica, jo nga pakica…
Luan Rama – Problemi është që ta zgjidhim këtë gjë që t’i shkojmë seancës në mënyrë logjike me tre emra për të votuar emrat që ka maxhoranca. Nëse doni të bëjmë harakiri dhe ta quajmë Shpëtimin pjesë të pakicës, s’ka sens dhe do të bëhemi qesharakë dhe do ta komprometojmë të gjithë këtë proces që është shumë serioz.
Shpëtim Idrizi – Kjo i bie të jetë shumë e rëndë dhe unë po dëgjoj për herë të parë se është tjetër gjë…
Luan Rama – Nuk mund ta quajmë Shpëtimin pjesë të pakicës parlamentare këtu…as këtu nuk mund ta quajmë pjesë të pakicës parlamentare…, ose duhej që koalicioni të vinte me një…
Gramoz Ruçi – Të mos e zgjasim më tepër. Të mos merremi me interpretime kushtetuese tani, se po të jetë, hajde ta interpretojnë ata që, fjala vjen, KQZ-ja që e ka destinacion kushtetues çështjen se kush quhet pakicë dhe kush quhet shumicë… Këtu problemi shtrohet që ne do të zgjedhim sot tre kandidatë. Ti do ta lësh kandidatin tënd të votohet.
Shpëtim Idrizi – Për ku, te maxhoranca?
Gramoz Ruçi – Te maxhoranca do që ta lësh?
Shpëtim Idrizi – Po, te maxhoranca, po, por jo te pakica.
Gramoz Ruçi – Në rregull, do të votohet në seancë. Do ta tërheqësh, tërhiqe. Aty tre do të miratohen. Sipas ligjit nuk vihemi në barazim, si ti, si unë dhe si LSI-ja, sepse unë kam 60 deputetë, ti ke 6, këta kanë 20. Tani, normalisht unë nuk mund ta barazohem me ty.
Shpëtim Idrizi – Kjo është çështje tjetër. Të gjitha partitë parlamentare duhet të paraqesin kandidaturat, ky është ligji. Kryetari i Parlamentit i është drejtuar, sepse po të mos ishte drejtuar, nuk do ta paraqisja unë. E keni sjellë numrin 3, atëherë 3 partitë e para që kanë më shumë mandate.
Vasilika Hysi – Po edhe këtu nuk i bie kështu?
Mesila Doda – Jo, nuk i bie ashtu.
Shpëtim Idrizi – Ju të parët, LSI-ja e dyta dhe PDIU-ja e treta.
Mesila Doda – Ti thua të lajmërohen grupet parlamentare, sepse në qoftë se nuk do të ishte nuk na lajmëroje si grup parlamentar. Lajmëroje vetëm grupet parlamentare që kanë më shumë anëtarë dhe kaq.
Shpëtim Idrizi – Gramoz, janë dy interpretime të ndryshme që bëni ju, dhe zonja. Zonja thotë që ne duke interpretuar Kushtetutën jemi pakicë…
Gramoz Ruçi – Unë nuk po i futem asaj, sepse edhe unë kam mendimin tim, por nuk ka asnjë vlerë mendimi im në interpretimin e Kushtetutës në rastin konkret.
Vasilika Hysi – Të flasim ne si politikanë kjo nuk bën sens, por kjo është nga KQZ-ja. Unë nuk kam mendimin tim.
Mesila Doda – Vasilika, kam një pyetje: Kushtetuta dhe ligji që keni bërë a ka një frymë bashkëpunimi brenda kësaj? Domethënë, a është tendenca për të pasur një frymë bashkëpunimi, sepse përndryshe do të thoshte vetëm PD-ja dhe PS-ja? Derisa thoni grupet parlamentare, a i keni në bazë pikërisht këtë frymën e bashkëpunimit që duhet të ketë dhe një konsensus sa më të gjerë? Sepse kjo ka qenë edhe fryma, edhe tendenca me të cilin ke bërë ligjin, derisa thua grupet parlamentare. Që në këtë moment ti ke hequr…
Vasilika Hysi – Mesila, kush e përcakton shumicën dhe pakicën?
Mesila Doda – Shumicën dhe pakicën?
Vasilika Hysi – Zgjedhjet e 2013.
Mesila Doda – Pse jemi ne me zëvendësministër, ne tërhiqemi?
Vasilika Hysi – Duhet ministër.
Mesila Doda – Çfarë do të thotë kjo?
Shpëtim Idrizi – Më mirë thuaj: ty nuk dua të jap gjë dhe nuk ishim fare në këtë tavolinë ne, as nuk çoja asnjë përgjigje.
Gramoz Ruçi – Ndoshta edhe unë mund ta bëja atë, por nuk e kam bërë as me LSI-në, nuk kam folur që të ulem. Është normale kjo. Në rrafshin partiak dhe politik unë jam plotësisht dakord me ty. Tani në planin juridik unë nuk mund të mbaj pozicionin këtu dhe të them: jo, se ti je në opozitë. Dakord. Unë e respektoj interpretimin e Kushtetutës cila quhet pozitë dhe cila quhet opozitë, ashtu sikurse pakicë e të tjerë.
Mesila Doda – Edhe ne kemi sjellë përgjigje po sipas ligjit.
Gramoz Ruçi – Ju keni sjellë përgjigje, do të shkojë në votim.
Ilir Meta – Domethënë…
Mesila Doda – Kjo është gjëja e fundit, nuk është ndonjë problem, gjithmonë shkojnë.
Shpëtim Idrizi – Do të shkojnë të katërt për ta zgjidhur…?
Gramoz Ruçi – Jo, katër për tre.
Shpëtim Idrizi – Katër për tre nga maxhoranca?
Gramoz Ruçi – Patjetër, katër për tre! Ne kaq do të votojmë sot.
Shpëtim Idrizi – Atëherë, bëheni projektvendimin katër për tre dhe rrëzojeni kandidaturën e PDIU-së.
Gramoz Ruçi – Urdhëro?
Shpëtim Idrizi – Bëjeni vendimin katër për tre…
Gramoz Ruçi – Këtë nuk e di si do të lihet.
Shpëtim Idrizi – Kështu pra e lamë të përbashkët. A the që do të bëjmë katër për tre?
Gramoz Ruçi – Katër janë, një dorëzohet.
Shpëtim Idrizi – Po pra.
Gramoz Ruçi – Tani, unë politikisht po të them ty: ti nuk duhet të pretendosh të barazohesh me mua.
Shpëtim Idrizi – Dëgjo, dëgjo…
Gramoz Ruçi – Dakord?
Shpëtim Idrizi – …kjo është çështje tjetër.
Gramoz Ruçi – Po.
Shpëtim Idrizi – Kjo është pastaj çështje e analizës që mund ta kishim bërë jashtë kësaj mbledhjeje.
Mesila Doda – O Gramoz, politikisht, ti nuk kishe…
Gramoz Ruçi – Nuk e ke bërë as ti, as unë. Pse e le për këtu?
Mesila Doda – Më fal, o Gramoz, politikisht, ti nuk kishe arsye pse të barazoheshe me opozitën. Dakord?
Gramoz Ruçi – Si?
Mesila Doda – Politikisht nuk kishte arsye të barazoheshim me opozitën. Ti ke 90 vota, ato kanë 50, dakord?
Shpëtim Idrizi – Me të njëjtën logjikë.
Mesila Doda – Politikisht, me të njëjtën logjikë, ti nuk kishe arsye pse ta ndaje 50 me 50.
Gramoz Ruçi – Nuk është…
Mesila Doda – Si nuk është? E njëjta gjë pra. Po flasim për numra.
Gramoz Ruçi – Urdhëro?
Mesila Doda – A flasim për numra? Kjo është logjika e numrit. Në qoftë se flasim për konsensus…
Gramoz Ruçi – Po mirë, çfarë…? Çfarë doni nga unë ju?
Mesila Doda – Jo, mor, jo, po të them që kjo nuk është logjikë numrash.
Gramoz Ruçi – Por çfarë është?
Mesila Doda – Është logjikë konsensusi. Në qoftë se është konsensus…
Gramoz Ruçi – Logjika e PS-së është midis…
Mesila Doda – Ti e shkatërron konsensusin me atë përballë, e shkatërron edhe me atë që ke brenda. Dakord, vazhdojeni.
Gramoz Ruçi – Po mirë, atëherë…
Mesila Doda – Në qoftë se doni që ta bëjmë luftë brenda, luftë jashtë, dakord…
Gramoz Ruçi – Në qoftë se ju e shikoni këtë se kjo prishka: luftë jashtë, luftë brenda që të barazohesh me mua…
Mesila Doda – Kështu është.
Gramoz Ruçi – Jo, moj, motër!
Mesila Doda – Të barazohem? As kam tendencë fare të barazohem unë. Ne po flasim për një proces.
Gramoz Ruçi – Pse nuk ke tendencë?
Mesila Doda – Ne po flasim a janë të gjitha palët, se në fund fare, siç e keni thënë edhe ju…
Gramoz Ruçi – Të gjitha palët.
Mesila Doda – Tjetër është arrogancë, tjetër gjë është kaq ke mundësi të bësh.
Shpëtim Idrizi – Të lutem, Mesila! Zonja Vasilika tha që ju jeni pjesë e pakicës dhe bëni…
Gramoz Ruçi – Nuk tha këtë Vasilika, mos e ngatërro.
Shpëtim Idrizi – E ngatërroj, se nuk kemi ministër. Prandaj thamë që jemi me zëvendësministër. A e dini pse po e bëjmë këtë? Sepse në qoftë se do ta dinim më
përpara…
Vasilika Hysi – Më fal, se ke shumë të drejtë.
Shpëtim Idrizi – Të më thoshit:“Shpëtimo, megjithëse Kryetari i Parlamentit ju ka kërkuar një kandidaturë, ne si shumicë e kemi menduar që ju të mos merrni pjesë”…
Gramoz Ruçi – Konsensus ishte pakica me shumicën, zonjë. Dakord?
Mesila Doda – E ke shkatërruar me shumicën, e ke shkatërruar me pakicën, e ke shkatërruar edhe brenda shumicës. Nuk ka më, deri këtu ke shkuar.
Gramoz Ruçi – Unë nuk kam shkatërruar asgjë.
Mesila Doda – Ke shkuar në limit.
Ilir Meta – E mbyllim. A ka gjë tjetër për seancën përveç votimit? Mirë atëherë e mbyllim këtu.
/Shqiptarja/
