“Nëse Bashkimi Europian e lë jashtë Kosovën atëherë të gjithë shqiptarët në rajon do të jetojnë në një hapësirë të vetme”, u shpreh president i Kosovës Hashim Thaçi.
Reagimi i tij vjen pas pohimeve të kryeministrit Edi Rama, për Politico-n se bashkimi i Shqipërisë me Kosovën nuk mund të përjashtohet nëse perspektiva për anëtarësimin e Ballkanit në BE venitet.
“Bashkimi Evropian, aktualisht as në raport me Kosovën dhe as me Ballkanin Perëndimor, nuk ka as vizion dhe as lidership për integrimin apo zgjerimin me përfshirjen e vendeve të Ballkanit Perëndimor. Këtë vonesë, këtë ngurtësi, e këtë mungesë largpamësie për fat të keq janë duke e shfrytëzuar ideologji dhe vende joeuropiane dhe të frymës e vizionit jo euroatlantik”, është shprehur Thaçi.
Thaçi tha se qytetarët janë të frustruar me BE-në, mungesën e fleksibilitetit dhe bllokadën e saj,si dhe me ndëshkimin që po u bëhet për procesin e liberalizimit të vizave, në një kohë kur Kosova i ka përmbyllur të gjitha kriteret e nevojshme.
