Kryeministri Edi Rama deklaroi se opozita me protestën e saj në çadër po mban peng Reformën në Drejtësi dhe Vetting-un.
“Çadra në mes të bulevardit atje në Tiranë i ka zënë rrugën popullit për të parë më në fund gjyqtarët dhe prokurorët që i kanë pirë gjakun popullit për 25 vjet, që të shkojnë prapa hekurave dhe jo të rrinë para popullit me çekiç në dorë dhe të vrasin drejtësinë sa herë u vjen mundësia që të bëjnë padrejtësi në këmbim të parave. Fakti që Reforma në Drejtësi nuk është një çështje politike dhe Vetting-u nuk është një çështje partiake por mishërimi i një aspirate 25 vjeçare që përputhet sot me interesin kombëtar dhe publik, ashtu nuk ka pikë karburanti dhe çadër që e ndal” ,tha Kryeministri.
Nga Vlora ku ishte i pranishëm në ceremoninë përkujtimore të 20-vjetorit të tragjedisë së Otrantos, Rama tha se familjarët e viktimave vuajnë ende mungesën e drejtësisë, ndaj sipas tij përpjekja për të penguar Reformën në Drejtësi është antikombëtare.
“Asgjë nuk ka vlerën e merituar nëse nuk ka drejtësi. Të afërmit e viktimave të kësaj tragjedie kanë në shpirt revoltën për mungesën e drejtësisë. Është antikombëtare përpjekja për ta penguar zbatimin e reformës, duke ngritur një bunker në mes të bulevardit”, u shpreh Rama.
