Drejtuesi i të rinjve republikanë amerikanë, Jason Emert, njeri i lobit grek në Amerikë, nuk ndryshon shumë nga Lulzim Basha, kur flet për situatën politike në Shqipëri. Ai qëndroi në Tiranë për të mbështetur protestën e opozitës, për të cilën thotë se do të bëjë gjithçka që të marrë sa më shumë mbështetje ndërkombëtare.
“Në këtë moment, mbi 60% e sondazheve të fundit thonë që shqiptarët nuk i besojnë rezultatit që do të dalë nga zgjedhjet. Ajo që duhet bërë së pari është të rikthehet besimi i shqiptarëve. Dhe këtë mund ta bëni nëpërmjet një qeverie kujdestare teknike që i lejon qytetarët të votojnë të lirë dhe të sigurojë se vota e tyre do të numërohet. Prandaj jemi këtu”, tha Emert.
Përfaqësuesi i të rinjve republikanë dhe lobit grek, Jason Emert i inkurajoi ata për rezistencë jashtë Parlamentit. Një këshillë kjo e kundërt nga ajo e ambasadorit amerikan Donald Lu, i cili mbështet shqetësimet e opozitës, por jo mjetet e saj.
“Nuk jam dakord me ambasadorin Lu. Ai gjendet në një situatë të vështirë… Ta quash linjë zytare, nuk e di, nëse është terminologjia korrekte, sepse shumë anëtarë të Kongresit kanë dërguar letra mbështetje për protestën, për lëvizjen për zgjedhje të lira e të ndershme… Kështu që, nuk di të them, nëse ka një linjë zyrtare që thotë se ne mbështesim kriminalitetin e qeverisë, por ne sigurisht që mbështesim Shqipërinë si një vend aleat dhe partner i madh i Shteteve të Bashkuara”, deklaroi Emert.
/top-channel.tv/
