“PDIU është më shumë e interesuar se kushdo tjetër për reformën në drejtësi, pasi ka si kauzë të saj, nevojën për drejtësi e prej nga do të vijë edhe zgjidhja e Çështjes së Çamërisë.”
Reforma në drejtësi, zgjidhja e Çështjes së Çamërisë, zgjedhjet e lira e të ndershme, ishin pjesë e rëndësishme e fjalës së kryetarit të PDIU-së, Shpëtim Idrizi, në një takim me strukturat e kësaj partie në Sarandë.
Idrizi përsëriti qëndrimet e PDIU-së për reformën në drejtësi duke ritheksuar nevojën për një pakt kombëtar për këtë reformë dhe integrimin e vendit në BE. Ai theksoi që reforma në drejtësi është detyrë patriotike, prej së cilës mund të hidhen themelet e Republikës së Re. Duke e lidhur këtë reformë me Çështjen e Çamërisë, Idrizi tha që PDIU është më shumë e intersuar se kushdo tjetër për reformën në drejtësi, pasi e ka si kauzë të saj nevojën për drejtësi dhe prej nga do të vijë edhe edhe zgjidhja e Çështjes së Çamërisë.
Bashkimi Kombëtar dhe integrimi në Europë sipas Idrizit janë rrugë që i bashkojnë dhe nuk i ndajnë patriotët.
Idrizi foli për zgjedhjet e lira duke theksuar që është koha që dy partitë ta lexojnë mirë votën e shqiptarëve dhe të heqin dorë nga monopoli që ata mendojnë se kanë mbi votën e tyre. Sipas tij, grabitja e numëruesit në dëm të PDIU-së është shënuar në vërejtjet e OSBE-ODIHR. Këto vërejtje dhe zbatimi i ligjit elektoral janë e vetmja kërkesë dhe kusht politik i Partisë Drejtësi Integrim dhe Unitet.
Vëmendja e PDIU-së për rininë, për gratë e për shumë problematika të jetës në Sarandë e në mbarë vendin, ishin pjesë e diskutimit në takimin e Idrizit, me strukturat e PDIU-së. Bashkë me kryetarin e PDIU-së në takim ishte e pranishme edhe kryetarja e Forumit të Grave Vjollca Braho.
