Ministri i Jashtëm shqiptar Ditmir Bushati u takua në Athinë me homologun e tij Nikos Kotzias.
Në takimin që zgjati për gati 4 orë, të dy ministrat biseduan për gjithë çështjet që preokupojnë gjithë fashën e marrëdhënieve dypalëshe, por edhe situatën në rajon.
“Për herë të parë pas 25 vitesh, kemi ngritur Komisionin e Përbashkët për Çështjet Konsullore dhe rezultatet e këtij komisioni do të kenë një impakt të madh, sidomos për komunitetin shqiptar që jeton në Shqipëri. Kemi riaktivizuar Komisionin për tekstet shkollore. Jo thjesht pastrimin e tyre nga referenca historike, të cilat mund të jenë fyese për Shqipërinë apo Greqinë, por edhe për të ndërtuar një të ardhme më të mirë të përbashkët për brezat e rinj. Gjithashtu mendojmë se kemi bërë disa hapa përpara edhe në dakordësimin e pikëpamjeve përsa i përket çështjeve të së shkuarës së largët. Si rasti ligjit të luftës, apo rasti i punës që duhet bërë për varrezat e të rënëve grekë gjatë luftës në Shqipëri”, u shpreh Bushati
Të dy palët ranë dakord për uljen e tensioneve dhe retorikës nacionaliste të shprehur kohët e fundit mes dy vendeve.
Zoti Kotzias ka kërkuar që problemet mes dy vendeve të mos jenë pjesë e fushatës elektorale të 18 qershorit në Shqipëri, çka duket se ka gjetur edhe dakordësinë e zotit Bushati.
