Dy persona janë arrestuar dhe dy të tjerë janë shpallur në kërkim për grabitje të sendeve me vlerë historike në parkun kombëtar të “Apolonisë”.
Gjatë operacionit të koduar “Apollonia” në pranga kanë rënë shtetasit Toni (Ermir) Fasko, 35 vjeç dhe Saimir Fasko, 38 vjeç, të dy banues në fshatin Radostinë, Fier, ndërsa janë shpallur në kërkim shtetasit me iniciale A.F, 41 vjeç, E.F, 53 vjeç.
Policia lokale sqaron se këta shtetas në bashkëpunim me njëri-tjetrin kanë gërmuar në mënyrë të paligjshme në parkun kombëtar të mbrojtur të “Apollonisë” për një periudhë të gjatë kohore. Nga gërmimet kanë nxjerrë rreth 230 objekte arkeologjike si bronx, hekur dhe qeramike të cilat pasi i grumbullonin në banesat e tyre i përgatisnin me qëllim trafikimin e tyre.
Materialet arkeologjike të sekuestruara do t’i kalojnë për vlerësim Ministrisë së Kulturës ndërsa materialet procedurale do t’i kalojnë për hetime të mëtejshme Prokurorisë së Rrethit Gjyqësor Fier për veprat penale “Vjedhja e veprave të artit e kulturës” dhe “Trafikimi i veprave të artit e kulturës”.
