Të paktën 70 mijë persona janë evakuuar nga qyteti i Selanikut, për shkak të punimeve për asgjësimin e një bombe të Luftës së Dytë Botërore
Asgjësimi i një bombe nga L.II.B, një ndër më të mëdhatë e gjetura në rajone urbane të Greqisë ka shkaktuar një prej evakuimeve më masive të civilëve në Greqi në kohë paqeje. Të paktën 70 mijë persona janë evakuuar nga qyteti i Selanikut, për shkak të punimeve që po bën ushtria greke për asgjësimin e saj.
Banorët në një perimetër prej 2 km përreth bombës janë detyruar të largohen nga zona nga zyrtarë të sigurisë. Janë zhvendosur gjithashtu edhe 450 banorët e një kampi refugjatësh, që të gjithë të strehuar nëpër shkolla, pallate sporti dhe qendra kulturore.
Në këtë operacion kanë punuar në terren rreth 1.000 oficerë policie dhe 300 vullnetarë për t’u siguruar që është evakuuar edhe personi i fundit në zonën e rrezikshmërisë. Ushtria është shprehur se operacioni ka qenë mjaft i vështirë pasi mund t’i kërkojë ekipit rreth 8 orë punë, së paku, e më së shumti rreth dy ditë.
Bomba e pashpërthyer u zbulua gjatë punimeve në rrugë të javës së kaluar, për shkak të zgjerimit të depozitave të një karburanti.
