Të gjitha portalet që paguhen nga selia e Sheshit Willson shkruajtën ditën e djeshme se ministri i Drejtësisë, Ylli Manjani është ministri i dytë në këtë mandat qeverisës që LSI-ja e dorëheq. Sipas tyre, Edi Rama do e gjejë në tryezën e punës dorëheqjen e ministrit që shumë e pati zët. Në fakt, pritet që kryeministri ta shkarkojë këtë javë Manjanin, ndaj dhe takimi i fundit mes tij dhe Metës ishte aq shumë i tensionuar.
Viktimë entuziaste e këtyre lajmeve ra edhe doktori, i cili nëpërmjet një statusi në facebook e lidhi shkarkimin (jo dorëheqjen) me luftën e klaneve të drogës.
Ylli Manjani zyrtarisht u shpreh në mëngjes dhe nuk është dorëhequr ende, por është sëmurë, ndaj nuk ka dalë në zyrë. Sipas mediave të sheshit Willson, Manjani dëshironte të largohej, pasi nuk i pëlqen si po zgjidhet Avokati i Popullit, ndërsa qahet në letrën e tij për çështjen e konçesioneve. Në fakt, tek konçesionet LSI është “dorëjashtë”. Fjala vjen nuk i mbushi fare xhepat me konçesionin e mirëmbajtjes së Rrugës së Kombit me paratë e taksapaguesëve si të Shqipërisë, ashtu dhe të Kosovës.
Megjithatë, urdhëri i parë, anullon të dytin, ndaj Manjanin e kemi ende ministër të mbetur varur. Kështu që duhen parë zhvillimet që do sjellë java e re punës. Nëse me largimin e Manjanit, koalicioni sherranjos qetësohet, i bie që Ylli ishte kamikaz për llogari të Edi Ramës. Nëse me Manjanin grindja vazhdon, Ylli i bie të ketë qenë kamikaz i Ilir Metës.
Në të gjitha rastet do jetë dëshmor, por pa lavdi.
