Nga Klodian Tomorri
Për momentin gjëja më qesharake në Shqipëri është koalicioni që qeveris vendin.
Këta janë në qeveri bashkë, vënë në jetë politika dhe miratojnë ligje në bllok si mazhorancë, ndajnë përfitimet e pushtetit bashkë (përfshirë tendera, konçesione e të tjera, e të tjera), por sapo mbarojnë mbledhjen e qeverisë dalin e sulmojnë njëri-tjetrin.
Kjo as është parë e as është dëgjuar ndonjëherë.
Tani qeveria po ka dështuar, ka dështuar e gjitha. Nuk ka qeveri ku gjysma është e keqe dhe gjysma tjetër e mirë. Nuk ka!
Çdo ligj apo politikë që është vënë në jetë këto katër vite, është miratuar me vullnetin e lirë dhe të plotë nga të gjitha forcat politike e shumicës. Sepse, nëse njëra nga këto nuk do jepte pëlqimin, nuk do kishte mazhorancë, ligjet nuk mund të kalonin.
Nëse ndonjëra nga partitë e koalicionit qeverisës, ka pakënaqesi ndaj të tjerave (dhe kjo vlen për të gjitha), zgjidhja është e thjeshtë; prishet koalicioni. Shkohet në Parlament kërkohet shumicë e re për të formuar qeverinë. Nëse nuk ka mazhorancë, thirret vendi në zgjedhje. Kaq e thjeshtë është.
Kështu funksionon. Por, edhe kjo nuk bëhet në tre muajt e fundit të mandatit. Në tre muajt e fundit të mandatit, cilado forcë qeverisëse ka vetem një rrugë; të dalë përballë qytetarëve dhe të marrë faturën ose meritat e qeverisjes.
