Nga Alba Haruni
Ndoqa me vëmendje, emisionin “Opinion”, mbëmë në TV Klan. Të ftuarit në panel, përveç se shpalosën si kurdoherë tonalitetet e kordave vokale, nuk thanë asgjë për opinionin e gjerë dhe sidomos për të interesuarit e drejtpërdrejtë të debatit.
E pra, të interesuarit e vërtetë janë të gjithë ata emigrantë shqiptarë, të cilët vazhdojnë të jetojnë e punojnë në shtetin grek. Fëmijët e tyre të lindur apo jo në shtetin grek, janë tashmë në moshë për të kryer shërbimin e detyruar ushtarak për llogari të këtij vendi, megjithëse të dy vendet fqinje janë pjesë e së njëjtës aleancë ushtarake, NATO. Nisur nga eksperienca familjare, ku të dy nipërit e mi e kanë kryer këtë shërbim, bëj me dije se për të lindurit në territorin e Shqipërisë, ky shërbim është 6 muaj, kurse për të lindurit në territorin grek ky shërbim është 9 muaj dhe nuk merret fare parasysh kombësia e tyre.
Askush në atë panel bosh, nuk përmendi që prindërit e këtyre djemve, të cilët formuan me duar simbolin e shqiponjës, janë njëkohësisht dhe taksapagues të shtetit shqiptar. Sa herë mbajnë radhë për një çertifikatë, sa herë paguajnë qimet e kokës nëpër konsullatat tona pa përmendur se sa i rrjep shteti grek nga pagesat e herë pas herëshme. Askush nuk denjoi të thotë që këto familje emigrantësh mbushin autobuzët elektoralë për të votuar njërën apo tjetrën parti. Sa herë “baballarët” e kombit ju bëjnë vizita e ju krijojnë grupime partiake në vendet ku ata jetojnë e punojnë? Po askush nuk foli për këto. Ose s’dinë, ose s’duan!
Më së shumti mendoj se nuk dinë. Informohen për temat e debatit në minutat e fundit dhe diziformimin e tyre mundohen ta mbulojnë me tonalitetin e zërit.
Të dashur “panelistë” të këtyre debateve të ndjeshme për shumicën e opinionit, mos na hapni barkun!
Ajo që i duhet me urgjencë shqiptarëve tanë dhe bijve të tyre anekënd botës është Ministria e Diasporës, e cila do merrej drejtpërdrejtë me hallet e problemet e tyre të shumta. Nuk di pse kryeministri Rama heziton ta ndërtojë një ministri, e cila do kishte aktivitet të gjerë, por të ndryshëm nga Ministria e Jashtme që vepron në planin diplomatik nëpërmjet konventave të ndryshme në marrëdhënie mes shteteve. Një Ministri e Diasporës do merrej dhe do fokusohej kryesisht në problemet e shqiptarëve, për respektimin e vlerave dhe dinjitetit të tyre.
