Studiuesi Arben Llalla, njëri nga njohësit e mirë të çështjes greko-shqiptare thotë që fotot e fundit, ku shihen ushtarët grekë me kombësi shqiptare, tek bëjnë shqiponjën, simbolin e kombit shqiptar është një strategji e mirë organizuar nga shërbimi i sigurimit ushtarak grek.
Ai thotë se në 19 janar në Uashington është bërë një takim i lobit greko-amerikan, i cili i ka vetëm një prioritet, rrëzimin e qeverisë së Tiranës si pasojë e ngritjes së zërit për zgjidhjen e çështjeve të mbetura pezull mes dy vendeve, në veçanti Çështja Çame.
Në takimin e lobit greko-amerikan ka marrë pjesë Vangjel Dule, i cili është munduar që mos të ketë dëshmi fotografike në takim me Panos Kammenos, por siç shihet në fotot e mësipërme ai dallohet lehtë se gjendet afër ministrit të mbrojtjes së Greqisë.
Fotografia ku shihen shtatë kadetët është bërë në fillim të dhjetorit 2016 dhe u shpërnda në rrjetet sociale nga shërbimi i sigurimit ushtarak grek më 21 janar, ora 17.23 minuta.
Fotoja e dytë ku shihet një ushtar grek që bën shqiponjën dhe u përfol se është qipriot nuk është e vërtetë. Ushtari është minoritar grek dhe quhet Joanis S., i cili ka shtetësi greke, por jeton e punon në Qipro. Fotoja e tij është bërë në tetor të vitit 2016 dhe nuk figuron askund në qarkullim, pra në adresat e rrjeteve sociale. Ushtari Joanis S. për festat e fundvitit ka udhëtuar për në Qipro pranë familjes së tij. Ushtari Joani S. nuk do të dënohet për foton me shqiponjë, sepse është bërë me porosi nga vetë shërbimi inteligjent grek, ndërsa për shtatë kadetët do merren masa.
Të gjitha lojëra të shërbimit grek drejtohen nga njerëz të partive të djathta ekstremiste si “Agimi i Artë” dhe “Grekët e Pavarur” të Pano Kammenos.
Do jemi dëshmitar pas disa kohësh që çdo gjë do zbardhet dhe e vërteta do dalë ditës për diell.
Qëllimi i kësaj rrëmuje është që qeveria shqiptare të bjerë në kurth, mundësisht viktimë e qorrsokakut të jetë kryeministri Rama. Pranë Presidentit të SHBA, Donald Trump gjenden disa greko-amerikanë që janë aktivë në çështjen e aneksimit të jugut të Shqipërisë.
Qëllimi tjetër është që t’u hiqet shtetësia greke ose të ndalen dhënia e shtetësive gjeneratës së dytë të shqiptarëve në Greqi. Dhënia e e shtetësisë mundësohet me ligj, por partitë ekstremiste greke të djathta si “Agimi i Artë” dhe “Grekët e Pavarur” të Pano Kammenos duan anullimin e këtij ligji, i cili është votuar dikur në bazë të Kushtetutës së BE-së, anëtare e së cilës është Greqia.
“Mendoj që duhet të jemi të kujdesshëm dhe politikanët e Tiranës në opozitë nuk duhet të shkelin mbi dinjitetin kombëtar për të fituar zgjedhjet e qershorit 2017. Mbi të gjitha është Shqipëria dhe kombi shqiptar”, shpreh historiani Arben Llalla.
