“PDIU krijoi një ekuilibër të ri brenda koalicionit… LSI nuk ka asnjë mundësi që të bëjë koalicion me PS.”
“Me largimin e LSI-së, koalicionit PS-PDIU rritet me 7%.”
Kështu mendon kryetari i Partisë Ligj dhe Drejtësi, avokati Spartak Ngjela. I ftuar në Top Story, Ngjela përjashton mundësinë që PS dhe LSI të dalin bashkë në koalicionin e zgjedhjeve të 18 qershorit.
“LSI nuk ka asnjë mundësi që të bëjë koalicion me PS. Shenjat janë që nuk mund të ketë më koalicion. Nuk besoj që të kemi një koalicion PS-LSI”, tha Ngjela.
Ai theksoi se PDIU krijoi një ekuilibër të ri brenda koalcionit qeverisës duke shmangur shumë probleme që u krijuan brenda kësaj aleance, për shkak të kapriçove të LSI-së.
“Nuk lejoi që të krijohej krizë brenda mazhorancës. Ka ndihmuar në shumë probleme. I hoqi forcën politike Metës, që i ra në funksion të reformës në drejtësi”, tha Ngjela. Sipas tij, nga largimi i LSI-së, PS dhe koalicioni do të rritej me të paktën 7 përqind në krahasim me 2013-n.
“Jam i bindur që minimumi që PS dhe koalicioni në 2013 ka humbur rreth 7 përqind ngaqë ka afruar Metën”, u shpreh ai. Ngjela tha se në këto zgjedhje kryeministri Rama do të përballet me shumë kundërshtarë edhe brenda mazhorancës.
“Nuk është vetëm opozita kundërshtare e tij. Ka edhe kundërshtarë të tjerë”, tha Ngjela.
