Nga Enkel Demi
Në fundvitin që shkoi ndërroi jetë një nga njerëzit më me rëndësi të Shqipërisë të këtij çerekshekulli. Meqë nuk dëshiroj të hyj në intimitetin e familjarëve nuk po e them emrin e të ndjerit. Në ditët e fundit të jetës ky personalitet po vuante në një nga spitalet publike të Tiranës. Interesi ishte i madh jo vetëm nga familja, miqësia, por edhe qeveria. Vetë Ilir Beqja, ministër i Shëndetësisë e vizitoi të sëmurin dhe u tha familjarëve që mos të shqetësoheshin, sepse ai do të merrte gjithë mjekimin e duhur, nuk do t’i mungonte asgjë dhe për të do të bëhej e pamundura. Pikërisht, tek u fliste të afërmëve duhet pranuar që i qetësoi disi dhe u fali do dekika optimizëm. Pa mbaruar mirë kjo bisedë një infermiere i shkoi vëllait të të sëmurit dhe i tha se duhej të blente në farmacitë private aksh ilaç, sepse spitali nuk kishte barna të tilla. Kuptohet si janë ndjerë ata që sapo dëgjuan ministrin t’u premtonte se nuk do i mungonte asgjë. Në spital sot e kësaj dite vazhdojnë të sëmurët që ministri nuk ka mundësi t’i vizitojë. Të afërmit e tyre organizojnë turne për të qenë të gatshëm të blejnë ilaçe si ditën, po aq dhe natën për të dashurit e tyre të sëmurë.
Dje, ministri vizitoi Dispancerinë, sepse atje u vendos aparati i radiografisë. Ai u takua me mjekë, infermierë e të sëmurë dhe askush nuk pati ankesa për të. Ministri është shfaqur sërish komunikues me njerëzit aty rrotull, madje është përkulur mjaft të dëgjojë të moshuarit, pasi gjatësia në këtë rast nuk e ndihmon.
Ilir Beqja është padyshim njeriu më i sulmuar politikisht në qeverinë e Edi Ramës. Ky i fundit ka marrë përsipër ta përballojë vetë sulmin që i është drejtuar ministrit të Shëndetësisë. Brenda 10 ditësh ai e ka mbrojtur dy herë Beqen publikisht. Kjo rrëfen sa i rëndësishëm është në jetën politike të kryeministrit ky njeri. Po kështu, për të sfiduar kritikët Edi Rama ka ngarkuar pikërisht më të sulmuarin të hartojë raportin për punën tre vjeçare të qeverisë.
Në pikëpamjen e ngulmimit Edi Rama nuk ndryshon në këtë këndvështrim nga parardhësit e tij që aq shumë i ka shpotitur. Ka promovuar dhe ka mbrojtur më të sulmuarit, më të akuzuarit. Kjo lloj sjellje është rrjedhojë e mentalitetit lindor të klasës sonë politike. Problem është se sa më shumë e mbron Edi Rama ministrin e tij, aq më shumë shtohen gojët e liga që Ilir Beqja ka me kë i ndan si përfitimet, si dhe namin e keq.
Megjithatë, turnet e të afërmëve tash janë një normë tre vjeçare dhe ajo infermierja që kërkon ilaçe se spitali nuk ka, i ka ardhur shpirti në majë të hundës, por të sëmurit asgjë nuk duhet t’i mungojë, sepse kështu thotë dhe ministri.
