Ka mbetur e pakuptueshme përse protokolli e nxorri Bujar Nishanin deri në shkallët e avionit në Rinas për të pritur sekretarin e Shtetit, John Kerry. Ata vetëm sa kanë shtrënguar duart dhe kanë bërë dy tre foto. Megjithatë Presidenti ka lëshuar një deklaratë për shtyp, ku flitet për detajet e një “takimi” në këmbë mbi një tapet të kuq të shkurtër po aq sa takimi.
Ja çfarë thotë Presidenca me këtë rast:
“Presidenti i Republikës, Sh. T. Z. Bujar Nishani i uroi mirëseardhjen në Shqipëri Sekretarit amerikan të Shtetit, John Kerry, për t’i shprehur mirënjohjen e thellë të shqiptarëve për të gjithë mbështetjen e pakursyer, veçanërisht për integrimin e vendit në strukturat Euroatlantike.
Presidenti Nishani u shpreh se kjo vizitë është dëshmi e qartë dhe domethënëse se miqtë dhe partnerët tanë më të mirë janë pranë nesh në këto momente që rreziqet dhe kërcënimet janë afruar me Shqipërinë dhe rajonin.
Kreu i Shtetit shqiptar e siguroi Sekretarin Kerry për vendosmërinë e Shqipërisë në luftën kundër krimit të organizuar dhe korrupsionit. Presidenti Nishani përcolli gjithashtu përshëndetje të ngrohta e të përzemërta për Presidentin e Shteteve të Bashkuara të Amerikës, Barack Obama.”
