Kryeministri ndan tapi legalizimesh në Konispol: Shtëpia më e sigurt për minoritarët është Partia Socialiste e Shqipërisë”
I veshur me një xhup që mban logon e Juventusit, kryeministri Rama është drejtuar sot në Jug të vëndit për të ndarë disa tapi legalizmesh. Në takim me banorët e Konispolit, Rama ka shkëmbyer batuta me pjestarë të minoritetit grek. Në bashkëbisedim me njërin prej tyre, Rama ka thënë me humor: Je i Dules apo i joni. Përtej shakave, kryeministri i ka garantuar minoritarët se qeveria e tij nuk bën dallime nëse je shqiptar apo grek.
“Minoritarët e kësaj zone marrin një mesazh shumë të qartë që është mesazhi i qeverisë sonë, se për ne nuk ka asnjë dallim, përkundrazi vetëm respekt, për ata që bëjnë zhurmë për të drejtën e pronës. Ja ku e ka një shembull konkret që është e kundërta. Për ne e njëjtë si ai që ka kombësi greke dhe shqiptare. Shtëpia e tyre më e sigurt është Partia Socialiste e Shqipërisë, thirrje minoriteteve”.
Rama u shpreh se interesat partiake ngrenë gjithmonë dallgë artificiale, por komunitetet që bashkëjetojnë si ata grekë e shqiptarë nuk ia prek kush themelet, aq më pak politika.
“Lidhur me interesat partiake ngrihet dallgë artificiale për ti fryrë një zjarri që nuk të ndizet më media, gazeta por jo aty ku shqiptarët bashkëpunojnë e do bashkëpunojnë gjithë kohës, dhe themelet e këtyre komuniteteve nuk i prek dot politika. Për ta gëzuar si pronar dhe jo si banor shtëpinë e tyre”.
