Ministri i Punëve të Jashtme Ditmir Bushati mori pjesë ditën e sotme në Samitin e përvitshëm të Ballkanit Perëndimor të organizuar nga “Friends of Europe”, me temë “Ballkani – Duke nxitur ndërlidhjen gjatë rrugës për në BE”.
Në këtë Samit të nivelit të lartë ishin të ftuar dhe Komisioneri për Zgjerimin dhe Politikën e Fqinjësisë Johannes Hahn, ish-Komisioneri Stefan Fule, Drejtorja për Ballkanin në Shërbimin e Jashtëm të BE-së Angelina Eichhorst, eurodeputetja Tanja Fajon, si dhe shumë personalitete të tjera dhe studiues të çështjeve evropiane.
Ndër temat e diskutuara në Samit ishin rigjallërimi i procesit të integrimit europian, nxitja e biznesit dhe investimeve në rajon, ndërlidhja në rajon, migracioni, punësimi, bashkëpunimi rinor, dhe rreziku i radikalizmit.
Ministri Bushati, gjatë fjalës së tij në panelin e “Anëtarësimit në BE – rruga e gjatë nga vizioni në realitet” u ndal tek kontributi i veçantë e pozitiv që ka dhënë anëtarësimi në BE në procesin e demokratizimit dhe shtet-konsolidimit të vendeve të Ballkanit Perëndimor si dhe bashkëpunimin rajonal. Në të njëjtën kohë, ai nënvizoi bashkëpunimin e suksesshëm të vendeve të Ballkanit Perëndimor dhe BE-së në adresimin e sfidave të përbashkëta të sigurisë.
Duke u ndalur në miratimin e ligjit të Vetting-ut për jetësimin e reformës në drejtësi, ministri Bushati u shpreh se “Komisioni Europian ka vënë në dukje rëndësinë e veçantë të zbatimit të ligjit të Vetting-ut si bazë e reformës në drejtësi dhe ndikimin që do të ketë në përmbushjen e prioriteteve të tjera kyçe”.
