“Nuk mund të pranojmë që në Shqipëri të hyjnë persona që flasin për Vorio-Epirin. Çështja e Çamërisë është çështje dinjiteti, reciprociteti për të gjithë shqiptarët”
“Çështja e shqiptarëve të Çamërisë, duhet të flasë me zërin e akademikëve tanë si një çështje thelbësisht shqiptare që i përket historisë së kombit shqiptar”, kështu tha sot, kryetari i PDIU-së, Shpëtim Idrizi në një aktivitet në Akademinë e Shkencave. Ai i ka bërë thirrje akademikëve të përfshihen në evidentimin e vlerave të hitorisë së Çamërisë dhe kryesisht të vërtetën e kësaj historie.
Gjatë promovimit të librit “Çamëria, Vështrim gjeopopullativ dhe etnokulturor”, të profesor Selman Sheme, Idrizi tha ndër të tjera: “Genocidi ishte programuar për mbi 30 vite, vijon edhe sot. Jam i bindur se e drejta do të triumfojë. Ka insinuata arrogante për të përmbysur të vërteta të mëdha. Akademikët të përfshihen në nxjerrjen e të vërtetës. Është një padrejtësi historike, genocidi dhe shkelja e të drejtave.”
Gjatë fjalës së tij, Idrizi tha se është e papranueshme të lejohet hyrja në Shqipëri e personave që flasin çdo ditë për Vorio-Epirin duke theksuar se edhe çamët kanë të drejtë të kërkojnë ngritjen e varrezave për të rënët e tyre në Greqi.
“Në Shqipëri janë ngritur dy varreza të ushtarëve grekë, por kërkohen të tjera. Po ne nuk kemi të drejtë të kërkojmë varreza, nuk kemi të drejtë të nderojmë të rënët tanë? Dëgjova që më adresohej edhe një përfaqësues i “Agimit të Artë” dhe kërkonte që shqiptarët dhe çamët t’i ndihmonin ata. Aq cinike është kjo sa unë t’i drejtohem “Agimit të Artë” dhe t’i kërkoj ndihmë. Nuk mund të pranojmë që në Shqipëri të hyjnë persona që flasin për Vorio-Epirin. Çështja e Çamërisë është çështje dinjiteti, reciprociteti për të gjithë shqiptarët.”, deklaroi Idrizi.
Marrëdhënie reciproke
Kreu i PDIU-së ritheksoi se PDIU dhe popullsia çame, dëshirojnë marrëdhënie reciproke dhe dialog me Greqinë.
“Nga njëri krah kemi Ligj Lufte, nga krahu tjetër Traktat Miqësie. Ne duam marrëdhënie reciproke dialogu me Greqinë. Por, nëse s’ka dialog dhe ka monolog çfarë të bëjmë ne? Të presim sa t’i bjerë mendja Greqisë të heqë Ligjin e Luftës. Mbi ne nuk mund të vazhdojë diskriminimi. Nëse ka një komunitet që kërkon të ketë marrëdhënie të mira me Greqinë, absolutisht që jemi ne. Duam të kthehemi në shtëpitë tona, të marrim nënshtetësinë greke dhe të gëzojmë të gjitha frytet e lirisë. Po e kërkojmë këtë dialog, po me kë?”, u shpreh Idrizi.
Ligji i Luftës
Duke folur për Çështjen Çame dhe për të ato detaje që lidhen me të, Idrizi, theksoi se Greqia nuk e heq ligjin e luftës, sepse qenia në fuqi e këtij ligji, ka të bëjë vetëm me sekuestron e pronave të Çamërisë.
“Tre vjet na është dashur të shkojmë me shkresa nëpër studio të ndryshme dhe t’u tregonim shqiptarëve se Ligji i Luftës me Greqinë ekziston. Ligji i vitit 1940 është në fuqi për çështje pronësore. Për sekuestron e vendosur në pronat e shqiptarëve. Kjo është arsyeja që Greqia thotë njëherë do ta heq, njëherë nuk e heq. Po të pyesësh babin tim, gjyshin tim dhe baballarët e të gjithëve këtu e kanë ditëlindjen të gjithë më 31 dhjetor. Nuk mundemi dot të vazhdojmë thjesht dhe vetëm ne ta mbrojmë këtë çështje.”, u shpreh Idrizi.
Një ditë më parë, gjatë aktivitetit të “JO-së greke” mbajtur në Manastirin e Këlcyrës, kreu i “Agimit të Artë” për Rajonin e Janinës, Konstantinos Anagnostis tha se shqiptarët duhet të lejojnë hapjen e varrezave të reja në jug të vendit.
