Gjatë periudhave të ndryshme të vitit, ju mund të kujdeseni rregullisht për flokët. Por koha e ftohtë i dëmton, lagështira po ashtu, ndaj me gjithë kujdesin, majat gjithmonë ndahen në dy pjesë. Gjatë dimrit, ekspertët japin këshilla të ndryshme për kujdesin ndaj flokëve. Produktet natyrale, maska, larje e kujdesshme etj. Ka diçka që duhet ta dini, nëse edhe ju vuani nga dëmtimet e flokëve apo majat e këputura gjatë dimrit.
- Dermatologët e pranojnë që beteja me kohën e ftohtë është gjithmonë e vështirë. Ajri i lagësht është i dëmshëm, ndaj duhet të bëni më shumë kujdes. Gjatë ditëve të ftohta, për të pasur flokë të shëndetshëm, fillimisht fokusohuni te larja. Kjo nuk është e rëndësishme vetëm në dimër, por në çdo kohë të vitit për flokë të shkëlqyeshëm. Sa më të gjatë t’i keni flokët, aq më shumë kujdes duhet të keni me larjen.
- Specialistët këshillojnë që për larjen e flokëve duhet të fokusoheni vetëm te skalpi i kokës dhe jo në maja. Gabimi më i madh që bëjmë më shpesh është mbledhja e flokëve në majë të kokës dhe larja me shampo. Kjo është një mënyrë që çon shumë shpejt në dëmtimin e majave të flokëve, madje ndihmon në copëtimin e tyre. Flokët lërini natyrshëm dhe përqendrohuni në skalpin e kokës më shumë sesa te pjesa tjetër.
- Një gabim tjetër që po ashtu e bëjnë shumica nga ne është larja me ujë të nxehtë. Në kohën e ftohtë, uji i nxehtë për flokët është një gabim i madh. Uji i nxehtë largon të gjitha yndyrat natyrale, duke ndikuar kështu në tharjen e flokëve dhe më tej këputjen e tyre.
- Po kaq e rëndësishme është edhe tharja. Në mbrëmje apo në mëngjes, ne gjithnmonë nxitojmë, ndaj edhe i thajmë flokët sapo kemi dalë nga dushi. Tharja e flokëve me tharëse kur ata janë të lagur i dëmton shumë dhe ndikon drejtpërdrejt në tharjen e majave që më vonë këputen. Para se t’i thani me tharëse, mbajini mbështjellë me peshqir 15-20 minuta.
