Kryeministri, Edi Rama, i shoqëruar dhe nga Ministra të kabinetit ka inspektuar disa projekte në kuadër të rilindjes urbane, në Gjirokastër, Përmet, Tepelene dhe Këlcyrë.
I shoqëruar nga Ministrja e Kulturës Mirela Kumbaro, kreu i qeverisë inspektoi nga afër punimet për restaurimin e Pazarit të Gjirokastrës, ku parashikohet konsolidimi dhe rivitalizimi i kompleksit të dyqaneve dhe ambienteve ndihmëse si dhe rikonstruksioni i sheshit “Çerçiz Topulli”. Rama u shpreh se qëllimi është t’i ftojmë sipërmarrësit të bëhen pjesë e këtij programi.
Kumbaro: “Kemi një projekt tjetër për të restauruar 20 shtëpitë që ju i keni njoftuar tashmë, që i kemi quajtur Rrjetin e Shtëpive të Shkrimtarëve, sipas modelit të shtëpisë së Kadaresë. Gjithë ideja është për të dhënë modele të rijetëzimit të shtëpive të vjetra në hotele, restorante dhe zyra shërbimi.”
Rama: “Ajo që ne duhet të bëjmë gjithmonë e më shumë me insistim, është që t’i ftojmë sipërmarrësit që të bëhen pjesë e këtij programi. Rrjeti i Shtëpive të Shkrimtarëve ku çdo shtëpie t’i vëmë emrin e një shkrimtari të dashur për Kadarenë, do ta bëjë shumë atraktive Gjirokastrën edhe nga kjo pikëpamje.”
Kryeministri Rama vizitoi gjithashtu edhe Përmetin dhe inspektoi nga afër rilindjen urbane.
Projekti i rilindjes urbane në Përmet me vlerë rreth 103 milion lekë parashikon krijimin e zonave rekreative, përmirësimin e ndriçimit dhe rikonstruksionin e rrugëve për këmbësorët, rikonstruksionin e rrugëve automobilistike, të shtëpisë së kulturës dhe rikonstruksionin e fasadave.
Në Tepelenë projektet e rilindjes urbane konstistojnë në rikonstruksionin e rrugës deri në hyrje të kalasë dhe shkollës së mesme e përgjithshme “Abaz Shehu”.
Ndërsa në Këlcyrë është ndërhyrë në rikualifikimin e përroit të lagjes “Gur’, si dhe sistemimin e shtratit të përroit.
Projekti përfshin korsi biçikletash, pedonalen, dy sheshe me shatërvanë të vegjël dhe lodra për fëmijët.
