Ernejt Shyti, 24-vjeçari që ndodhet në burg për vrasjen e Behar Sofisë, ngjarje e ndodhur më 25 shkurt të vitit 2021, ka zbuluar se të njëjtat persona që e kishin paguar për këtë atentat, i kishin ngarkuar dhe një tjetër detyrë. Në dëshminë e dhënë në seancën gjyqësore, sipas gazetarit Sokol Dema, Shyri ka thënë se ai ishte ngarkuar të kryente një tjetër vrasje në Gjermani, për të cilën do të paguhej 500 mijë euro.
I riu thotë se do të vriste një 34-vjeçar që shtëpinë e kishte në cep të rrugës, por emrin nuk ia ka bërë publik dhe nuk ka treguar nëse personi në fjalë ishte shqiptar. Paratë, ka shtuar Ernejt Shyti, do t’i merrte nga një person që njihej si “Bajlozi”, por që ai nuk e kishte idenë se kush ishte.
66-vjeçari Behar Sofia, i njohur si “padron droge” në Shqipëri u vra rreth orës 09:00 të 25 shkurtit teksa ecte me këmbë pranë Piramidës. Ai u ndoq nga Shyti, i cili, i veshur me maskë Covid-19 e qëlloi dy herë me armë zjarri. Deri më tani janë identifikuar si të përfshirë për vrasjen e Behar Sofisë shtetasit: Ernejt Shyti , Xhuliano Visha, Leonard Xhixha, Skënder Vathi dhe Bujar Leze, që nga ana e tyre mbajnë qëndrim mohues.
