Korçë-Kryetari i Kuvendit Ilir Meta duket se i është rikthyer sërish rolit të tij si negociator mes maxhorancës dhe opozitës duke thënë se nuk do lodhet së kërkuari konsensus mes palëve. Sa i takon kandidimit të mundshëm për President të Republikës Meta u shpreh se nuk komenton gara të pashpallura, ndërsa theksoi se e vetmja garë ku ai merr pjesë është ajo e kryetarit të LSI.
Meta: “Nuk kam asnjë koment për gara të pashpallura. E vetmja garë ku unë marr pjësë është ajo e kryetarit të LSI dhe kam kënaqësinë që këtë gara që e konsideroj si një sfidë për përmirësimin e mëtejshëm të LSI ta nis nga Korca dhe Pogradeci.
Kurrë mos mendoni se do të lodhem së kërkuari konsensus. Besoj se puna e komisionit ka qenë konstruktive dhe besoj se është e mundur që të punojmë në mënyrë konstruktive dhe në respekt të konsensusit të 22 korrikut.
Këtu jemi për çështjen e mollëve. Unë e kam një përgjigje shumë të qartë që e ardhmja e Shqipërisë është bujqësia, turizmi dhe jo kanabisi, prandaj për këtë cështje politika duhet të marrë një vendim dhe jo ti shmanget, por edhe partnerët ndërkombëtarë që janë të interesuar për të ardhmen e Shqipërisë. Është e rëndësishme që të vendoset sesi do të sillemi në të ardhmen në këtë fenomen”.
LSI po zhvillon sot takim me strukturat në Korçë dhe Pogradec në kuadër të zgjedhjeve për kryetarin e LSI-së, që do të mbahen më 6 nëntor 2016. Deri tani kanë konfirmuar kandidaturat për këtë garë kryetari Ilir Meta dhe anëtari i Kryesisë dhe kryetari i LSI-së për Tiranën, Shezai Rrokaj.
