Të shtunën është përplasja Murinjo – Guardiola, por në krah të portugezit është edhe Zlatan Ibrahimoviç, i cili e ka regjistruar trajnerin katalanës në listën e njerëzve më të padëshirueshëm
Derbi i së shtunës midis Mançesterëve, që do të luhet në “Old Traford”, ka mbledhur deri tani një mori arsyesh për të tëhequr vëmendjen e opinionit sportiv në mbarë botën. Fillimisht flitet për dy skuadra shumë të investuara, aq sa kanë thyer rekorde në shpenzime gjatë merkatos së verës dhe logjikisht spektakli duhet të jetë i garantuar. Përballë tyre do të jenë Hoze Murinjo dhe Pep Guardiola, të cilët kanë marrdhënie të tmerrshme me njëri-tjetrin, por trajneri katalanas do të gjejë edhe një tjetër armik këtë fundjavë. Në fushë, me uniformën e Junaitid do të jetë Ibrahimoviç, bomberin që përpara 6 vitesh e stërviste, por pas 12 muajsh të trazuar, Zlatan e ka regjistruar në listën e njerëzve të urryer, duke e cilësuar publikisht një frikacak. Por mbi të gjitha pritet të jetë një ndeshje e vështirë edhe për t’u menaxhuar nga forcat e rendit, për shkak të rivalitetit ekstrem të tifozerive. Ndërsa ata që merren me shifra dhe baste parashikojnë një takim që nuk duhet humbur për asnjë arsye. Asnjëherë në shtatë sfidat e fundit Mou – Pep (6 El Clasico dhe një Superkupë Bajern – Çelsi), nuk ka pasur më pak se 3 gola të shënuar. Kjo tendencë konfirmohet edhe nga statistikat e 10 ndeshjeve të fundit Junaitid – Siti, ku vetëm në 2 prej tyre janë realizuar më pak se 3 gola. Fat i keq është se nuk do të ketë një derbi Ibrahimoviç – Aguero (të dy me nga 3 gola të shënuar në po aq ndeshje të luajtura), pasi sulmuesi argjentinas është dënuar me 3 ndeshje pezullim nga Disiplina.
