Kryetari i Partisë Demokratike Sali Berisha ka zhvilluar sot një takim me kryetarët e degëve të Tiranës. Gjatë fjalës së tij, Berisha ka komentuar edhe protestën e pedagogëve e cila së fundmi ka qenë në kryeqendrën e diskutimeve nga figurat politike. Berisha tha se një shofer i Fondit Shqiptar të Zhvillimit paguhet 4 herë më shumë sesa një pedagog.
“Shqipëria dhe Edi Rama kalojnë nga një skandal në një skandal tjetër, nga një mashtrim dhe nga një vjedhje në tjetrën. Ne mbështesim çdo kauz të drejtë. Protesta e universiteteve është e një rëndësie jetike për kombin. Unë dua të jap një shembull. Një shofer në Fondin Shqiptar të Zhvillimit merr një rrogë 4 herë më të madhe se sa një lektor në universitetet tona. A ka qëndrim më përçmues ndaj elitës së kombit se sa ky. Çdo pedagogu universiteti i leverdis të jetë shofer i cili merr fiks katërfishin e pedagogut. Mora këtë aspekt. Janë pedagogë të Universitetit të Prishtinës, marrin dyfishin me ata të Universitetit të Tiranës”, tha Berisha.
Me tej ai tha se sa i përket kërkimit shkencor, ka qenë më mirë në kohën e Enver Hoxhës.
“Gjendja e kërkimit shkencor është e paimagjinueshme. Ka qenë më mirë në diktaturën e Enver Hoxhës. Jam dëshmitar vetë. Në diktaturë bëja projekt për një kërkim shkencor. Projektin tim e miratonte vetëm zv.dekani. Kishte shpenzime. Nuk e miratonte as rektori dhe as ministri. Ky ndaloi për 8 vite doktoraturat. Sot çdo pedagog për të publikuar një artikull duhet të paguajë. Në diktaturë na pagonin për çdo artikull që bënim. Sot pedagogu detyrohet të paguajë për artikullin që publikon. Këto janë qëndrime shkatërrimtare për universitetin. Universiteti është një pasuri kombëtare që duhet të mbrohet”, tha Berisha.
