Kevin Mustafa ishte djalë i vetëm. Ishte vetëm 20 vjeç dhe jeta e tij u ndërpre përgjithmonë mëngjesin e së martës në një aksident me motor në Bergamo të Italisë. Ai ishte viktima e katërt brenda 4 ditëve. Kevin Mustafa ishte 20 vjeç dhe kishte mbërritur në Terno d’Isola kur ishte ende shumë i vogël, së bashku me babain e tij shqiptar dhe nënën e tij Fanny Mourera, nga Ekuadori.
Familja kishte shkuar të jetonte në një pallat në via Roma 23H, pranë bibliotekës së qytetit. Prindërit e Kevinit u ndanë pothuajse menjëherë dhe djali u rrit nga nëna e tij.
“Ai ishte thjesht njëri prej nesh: ishte në klasë me mua në kopshtin e fëmijëve, në shkollën fillore dhe të mesme, askush nuk e ka parë ndonjëherë si emigrant”, tha dje një shoqja e tij, duke parë me sy të largët vendin e aksidentit.
Më pas, djali u diplomua për inxhinieri mekanike në Institutin Marconi në Dalmine dhe punoi në kompani të ndryshme: deri vonë ishte teknik mirëmbajtjeje në Brembo. Mëngjesin e djeshëm Kevini po ngiste motorin e tij Keeway dhe në orën 8.50 po lëvizte përgjatë rrugës provinciale nga Carvico në Terno, një rrugë që shpesh është e zënë me trafik në atë drejtim. Ndoshta dielli i ulët e pengoi motoçiklistin që të vinte re se edhe në atë moment përballë tij kishte një varg makinash që kishin ndaluar. Kur vuri re Citroen, ai u përpoq ta shmangte duke u kthyer majtas, por goditi këndin e pasëm të majtë të makinës dhe humbi ekuilibrin.
“Kur pashë djalin, ai tashmë po binte. Ai ra përpara dhe përfundoi me kokën në njërën nga rrotat. Djali ra shumë keq, iu thye helmeta. Unë zbrita menjëherë për ta ndihmuar atë dhe pesë-gjashtë persona të tjerë gjithashtu. Nuk e prekëm as sepse qafa e tij ishte në një pozitë të keqe dhe kishim frikë se mos i përkeqësonin gjërat, por telefonuam 911. Ai ende po merrte frymë edhe pse me shumë gulçim,“-tregoi një dëshmitar.
Kur helikopteri 118 dhe një ambulancë mbërritën në vendngjarje pak minuta më vonë, Kevin Mustafa kishte vdekur. Fjala u përhap shpejt në fshat, shumë nga miqtë e tij mbërritën. Disa prej tyre u grindën me një kurioz që kishte guximin të bënte shaka me aksidentin. Menjëherë pas kësaj ka mbërritur edhe nëna e viktimës dhe e dashura e tij Federica. Çifti po kërkonte një shtëpi, tek e cila planifikonin të shkonin të jetonin pas martesës, por ëndrrat iu prenë në mes. Trupi i Kevin Mustafës u dërgua në shtëpinë e varrimit në via Fratelli Calvi në Ponte San Pietro, ku do të qëndrojë deri nesër, kur do të bëhet edhe djegja. Për të nuk do të ketë ceremoni mortore.
